اسلام آباد۔22فروری (اے پی پی):مزن وزیر محمد شہباز شریف آذربائیجان ءِ صدر الہام علیف ءِ دعوت ءِ رد ءَ 24 ءَ بگر داں 25 فروری 2025 ءَ جمہوریہ آذربائیجان ءِ دو روچی سرکاری تر ءُ تاب ءَ کنت۔ درئی کارانی کارگس ءِ جارکش ءِ نیمگ ءَ چہ جاڑی بوتگیں بیان ءِ رد ءَ مارچ 2024 ءَ وتی اگدہ ءِ سر ءَ نندگ ءَ پد مزن وزیر محمد شہباز شریف ءِ آذربائیجان ءِ دومی تر ءُ تاب اِنت۔ مزن وزیر ءِ تر ءُ تاب ءِ ساھت ءَ مزن وزیر ءُ درئی کارانی وزیر سینیٹر محمد اسحاق ڈار ءُ ایندگر کلیدی کابینہ ءِ باسک ھواریں مزنیں تک ءِ ڈل ءِ ھمراھی ءَ آذربائیجان ءِ گوما دو نیمگی سیادی ءَ را گیش گہتر کنگ ءِ واستہ پاکستان ءِ مھکمیں عزم ءِ درشان اِنت۔ بیان ءِ رد ءَ تر ءُ تاب ءِ ساھت ءَ دوئیں نیمگ توانائی، تجارت، دفاع، وانگ ءُ زانگ ءُ موسمیاتی شوبگ آنی تہ ءَ دو نیمگی کمک ءَ را گیش مھکم کنگ ءِ واستہ وت مہ وتی دلچسپی ءِ پڑ آنی سر ءَ مزنیں گپ ءُ تران کن اَنت۔ تر ءُ تاب ءِ ساھت ءَ دوئیں نیمگ آنی نیام ءَ کمک ءِ بازیں شوبگ آنی تہ ءَ بازیں مفاہمت نامہ / معاہدہ آنی سر ءَ دستخط کنگ ءِ گمان اِنت۔ زانگ بہ بیت کہ پاکستان ءُ آذربائیجان ءِ نیام ءَ یکے دومی ءِ سر ءَ بھروسہ، مفاہمت ءُ دیریں یکے دومی ءَ را فائدگ مندیں کمک ءِ بنیاد ءَ گہتریں براتی سیادی است انت۔ آذربائیجان ءِ ھاسیں اقتصادی ءُ اسٹریٹجک شریک آنی تہ ءَ یک اِنت کہ آئی ءِ گوما بازیں شوبگ آنی تہ ءَ مھکمیں کمک ءِ دیمروئی کتگ مزن وزیر ءَ را جمہوریہ آذربائیجان ءِ برآمد ءُ سرمایہ کاری ءِ دیمروئی ءِ ادارگ ءِ کمک ءَ برجم داشتگیں کاروباری فورم ءِ ساھت ءَ کلیدی گشتانک دیگ ءِ اُمیت اِنت۔ اے تر ءُ تاب ءِ ساھت ءَ مزن وزیر آذربائیجان ءِ صدر ءِ ھمراھی ءَ قراباغ ءِ آجوئیں دمگ آنی ھاسیں تر ءُ تاب ءِ بھر ءِ رنگ ءَ فوزولی (کاراباغ) ءِ تر ءُ تاب ءَ ھم کنت۔
