اسلام آباد۔22فروری (اے پی پی):ایسوسی ایٹڈ پریس آف پاکستان ءِ منیجنگ ڈائریکٹر محمد عاصم کھچی ءَ اسلامی جمہوریہ ایران ءِ نیوز ایجنسی ءِ سروک ڈاکٹر حسین جابری انصاری ءُ آئی ءِ ٹیم ءَ را وتی ادارگ ءِ 90سال ءِ خدمت ءِ ناقابل یقین سنگ میل ءَ چہ گوزگ ءِ سر ءَ مبارک بات داتگ۔ ایم ڈی ارنا ءَ را وتی مبارکیں کلوہ ءِ تہ ءَ ایم ڈی اے پی پی ءَ گوشت کہ تئی ادارگ ءَ راستی، سرپدی، ءُ دیمروئی ءِ ھاترا وتی بے مٹیں عزم ءِ گوما راج ءِ رائے ءِ جوڑ کنگ ءُ راج ءِ بنیات آناں مھکم کنگ ءِ تہ ءَ مزنیں کردے پیلو کتگ۔ آئی ءَ گوشت کہ گوستگیں 90سال آنی تہ ءَ اسلامی جمہوریہ ایران ءِ ھال رسانکی ادارگ ءِ تہ ءَ معتبریں ھال ءُ اھوال آنی وسیلگ بوتگ، شہری آناں زانت ءُ زانشت ءِ وسیلگ ءَ توانمند کنگ ءُ آزات ءُ ذمہ واریں اھوالکاری ءِ رھبند آنی برجائی کنگ بوتگ۔ آئی ءَ گیش کرتگ کہ اے غیر معمولی سوبمندی شمئے محنت، ایمانداری، ءُ مزنیں نیکیں کار ءِ ھاترا وتی زند ءِ ندر کنگ ءِ گواہ اِنت۔ آئی ءَ گوشت کہ وھدے کہ شما اے راجدپتری ساھت ءَ را برجم دارگ ءَ اِت، ما آیوکیں سال آنی تہ ءَ برجاھیں سوبمندی ءُ نوکیں چیز آنی واستہ وتی نیکیں واھگ آناں درشان کن ایں ۔ ایم ڈی اے پی پی ءَ گیش گوشت کہ شما آیوکیں نسل آنی دلبڈی، وانینگ ءُ رھشونی ءِ تہ ءَ کرد پیلو کنگ ءَ برجاہ دار اِت۔ آئی ءَ گوشت کہ اے پی پی ءُ ارنا ءِ نیام ءَ 1981ءَ چہ ھال ءُ اھوال ءِ مٹ ءُ تپاکی بوتگ کہ ایشی ءِ تہ ءَ وت مہ وتی نپ ءُ دمگی ءُ میاں اوستمانی دیمروئی آنی ھال ءُ اھوال آنی مٹ ءُ بدلی بوتگ۔ منیجنگ ڈائریکٹر عاصم کھچی ءَ گوشت کہ دگنیا نوں یک گلوبل ویلج ءِ رنگ ءَ بدل بوتگ کہ ایشی ءِ تہ ءَ میڈیا ءِ کرد سک باز ارزشت دار اِنت آئی ءَ گیش کرتگ کہ مئے اُلس ءَ را پکوئیں ءُ راستین ھال ءُ اھوال ءِ پجارینگ ءِ واستہ دمگی ھال رسانکی ادارگ آنی نیام ءَ ھال رسانکی کمک المی اِنت۔ آئی ءَ گوشت کہ پاکستان ءُ ایران ءِ سرکاری ھال رسانکی ادارگ اے پی پی ءُ ارنا راستیں، ترندیں ھال ءُ اھوال شنگ ءُ تالان کنگ ءَ انت ءُ وتی کارمرد کنوک ءُ چاروک آناں واکیات آنی راستیں عکس ءَ پجارینگ ءَ انت۔ آئی ءَ گوشت کہ اے پی پی ءُ ارنا ءِ نیام ءَ ھال ءُ اھوال ءِ منوگری ءَ را براتیں ملک آنی اُلس ءِ آسراتی ءِ واستہ گیش مھکم کنگ بیت۔
