وفاقی وزیر اھوالکاری عطا اللہ تارڑ ءُ بحرین ءِ وزیر اھوالکاری رمضان بن عبداللہ النعیمی ءَ  گند ءُ نند کتگ ءُ دوئیں ملک آنی نیام ءَ دو نیمگی کمک ءَ را گیش کنگ، مہارت آنی تبادلہ ءُ یکجائی منصوبگ آناں دیمروئی دیگ ءِ واستہ وتی جزم ءِ درشان کتگ

ریاض۔21فروری  (اے پی پی): اھوالکاری، نشریات، راجی ورثہ ءُ دود ءُ ربیدگ ءِ وفاقی وزیر عطا اللہ تارڑ ءَ پاکستان ءُ بحرین ءِ نیام ءَ دو نیمگی کمک، مہارت آنی تبادلہ ءُ یکجائی منصوبگ آناں دیمروئی دیگ ءِ واستہ وتی جزم ءِ درشانی کتگ ءُ گوشت کہ پاکستان ءِ معیشت راستیں راہ ءَ روگ ءَ اِنت ءُ پاکستان سرمایہ کار آنی واستہ یک جوانیں سرمایہ کاری ءِ موہ اِنت۔ آئی ءَ  اے گپ سعودی میڈیا فورم ءِ موہ ءَ  بحرین ءِ اھوالکاری ءِ وزیر رمضان بن عبداللہ النعیمی ءَ  گوں گند ءُ نند ءَ  گوشت اَنت۔ وفاقی وزیر ءِ اھوالکاری ءَ گوشت کہ پاکستان ءُ بحرین ءِ نیام ءَ براتی سیادی سک باز مھکم انت، ایشی ءِ بنیات یکجائی ءِ ارزشت، راجدپتر ءُ دود ءُ ربیدگ انت۔ آئی ءَ گوشت کہ میڈیا ءِ شوبگ ءَ دوئیں ملک آنی نیام ءَ سیادی ءَ را گیش مھکم کنگ ءِ واستہ میڈیا ڈل آنی مٹ ءُ بدلی المی انت۔ وفاقی وزیر ءَ بحرین ءُ پاکستان ءِ میڈیا ادارگ آنی نیام ءَ کمک ءِ دیمروئی ءِ ضلورت ءِ سر ءَ زور پر دات ءُ بحرین ءِ نیوز ایجنسی بی این اے ءُ پاکستان ءِ سرکاری نیوز ایجنسی اے پی پی ءِ ھال آنی شیئر کنگ ءِ پنت ءُ شون کت۔ دوئیں نیمگ ءَ گوستگیں سال آنی تہ ءَ مزنیں تک ءِ ڈل آنی باقاعدہ تبادلہ ءَ را اولیت داتگ۔ وفاقی وزیر ءَ گوشت کہ گوستگیں روچاں بحرین ءَ چہ پارلیمانی ڈل ءَ پاکستان ءِ تر ءُ تاب کتگ ءُ مزن وزیر محمد شہباز شریف ءَ گوں گند ءُ نند کتگ ایشی ءَ چہ دوئیں ملک آنی نیام ءَ مھکمیں سیادی ءِ آہن انت۔ آئی ءَ  گوشت کہ پاکستان ءِ معیشت جوانیں کشک ءَ  دیم ءَ  جنزگ ءَ  اِنت، پاکستان گلوبل سرمایہ کار آنی واستہ جوانیں سرمایہ کاری ءِ موہ اِنت۔ اے موہ ءِ سر ءَ بحرین ءِ وزیر ءِ اھوالکاری ءَ گوشت کہ پاکستان ءِ گوما سیادی ءَ را ارزشت دار آں ۔ آئی ءَ گوشت کہ بحرین ءُ پاکستان ءِ نیام ءَ رھشونی ءِ کوھنیں رھشونی ءِ چیر دستی ءَ جتاجتائیں پڑ آنی تہ ءَ سیادی مدام دیمروئی کنگ ءَ انت۔ بحرین ءِ وزیر ءِ اھوالکاری ءَ رسانکدر ءِ پڑ ءَ کمک ءَ را گیش مھکم کنگ ءُ یکجائی منصوبگ آناں دیمروئی دیگ ءِ بحرین ءِ جزم  ءِ پدا زور دات۔