مراکش/اسلام آباد۔ 21 فروری (اے پی پی) بنجائی وزیر عبدالعلیم خان پارینے کہ پاکستان اٹی ذرائع مواصلات ءِ جہانی آب انا رداٹ کننگ انگ ءِ ، موٹرویز آ ایم ٹیگ و ای ٹکٹنگ نا گچین نفاذ، موبائل ایپ، ٹریول ایڈوائزری، سڑک آتا حالیت و موسمیاتی حوالکاری نا آسراتی ہم فراوان کننگ انگ ءِ۔ بنجائی وزیر عبدالعلیم خان تون یورپی کمیشن کن یواین نا ایگزیکٹیو سیکرٹری ٹٹیانا مولکین مراکش اٹی اوڑدہی کرینے۔ زرکاری بورڈ انا کنڈآن جاری اعلامیہ نا رداٹ یواین سیکرٹری جنرل نا نمائندہ جان ٹوڈٹ ہم بنجائی وزیر مواصلات عبدالعلیم خان تون اوڑدہی کرینے۔ بنجائی وزیر عبدالعلیم خان ٹٹیانا مولکین و جان ٹوڈٹ ءِ پاکستان اٹی ذرائع مواصلات نا بابت حوال تس۔ بنجائی وزیر و یواین نا نمائندہ پاکستان و ایلو ملک آتیٹی روڈ انفراسٹرکچر آ گپ وتران ہم کریر۔ بنجائی وزیر مواصلات داوخت آ گپ وتران کرسا پارے کہ پاکستان اٹی ذرائع مواصلات ءِ جہانی آب انا رداٹ کننگ انگ ءِ، موٹرویز و ایم ٹیگ و ای ٹکٹنگ نا گچین نفاذ کننگ انگ ءِ۔ اویواین نمائندہ غاتون گپ وتران کرساپارے کہ موبائل ایپ، ٹریول ایڈوائزری، سڑک آتا حالیت و موسمیاتی حوالکاری ہم فراوان کننگ انگ ءِ۔ بنجائی وزیر مستی پارے کہ شاری تا رکھ اکن قومی شاہرات آ ’’ایکسل لوڈ‘‘ نا پابندی ءِ ہم پک کننگ اُن۔ یورپی یونین نا ایگزیکٹیو سیکرٹری و یواین سیکرٹری جنرل نا نمائندہ بنجائی وزیر تون گپ وتران اٹی پاریرکہ یورپی یونین پاکستان اٹی ذرائع آمد ورفت ءِ رکھ کننگ نا خواہندار اُن۔ شاہرات آتے رکھ کننگ و روڈ سیفٹی نا جہانی آب آ عملدرآمد نا گرج ءِ، اقوام متحدہ نا چارٹر نا رداٹ غٹ ملک آتے روڈ سفیٹی ءِ پک کروئی مریک۔ اوپاکستان اٹی شاہراہ تیا شکست و مرک آتیٹی کمتی ءِ ہم است جم گوندار۔ اوڑدہی ٹی بنجائی وزیر عبدالعلیم خان و جان ٹوڈٹ ساڑی جہانی حالیت آتیا ہم گپ وتران کریر۔ فریق آک چارمیکو منسٹریل کانفرنس نا اڈتننگ آ است جمی نا درشانی ءِ کرسا پاریر کہ داوڑنا گام گیج آتیان پدتموک ملک آک زیات فائدہ ہرفنگ کیرہ۔
