اسلام آباد۔ 21 فروری (اے پی پی) بنجائی وزیر صنعت و پیدوار رانا تنویرحسین پارینے کہ روچہ مبارک اٹی بورہ نا فراوانی ءِ گچین کننگ و الس ءِ ریلیف فراوان کننگ نا گام گیج کننگانے، 27 روچہ اسکان اسٹال آتیا بورہ نا بے سلنگ آن فراوانی ءِ پک کننگک۔ داخیال آتا درشانی ءِ او جمعہ نادے آ تینا کماشی ٹی شوگر ایڈوائزری بورڈ انا دیوان اٹی کرے۔ دیوان اٹی بورہ نا فراوانی ءِ گچین کننگ و الس اسکان اونا رسینگ ءِ پک کننگ کن اہم فیصلہ کننگا۔ غٹ صوبہ غاتا چیف سیکرٹری تے پارت کننگاکہ او میونسپل کہول آ بورہ نا اسٹال خلیر تانکہ الس ءِ آسانی اٹ بورہ فراوان کننگ مرے۔ دیوان ءِ پاننگاکہ سندھ اٹی صوبائی حکومت نا کمک اٹ 230 شوگر اسٹال خلنگک، خیبرپختونخواٹی بورہ نا بہاکننگ کن 405 سیلنگ پوائنٹ آتا پیدواری ءِ کننگانے، پنجاب وبلوچستان اٹی ہم بورہ نا سد آاسٹال خلنگک۔ صوبائی حکومت آتے میونسپل کہول آ سیکورٹی، سفائی و ہجوم نا بست وبند نا زمواری تننگانے۔ بنجائی وزیر رانا تنویرحسین پارے کہ 27 روچہ اسکان اسٹال آتیا بورہ نا بے سلنگ آن فراوانی ءِ پک کننگک۔ بنجائی حکومت ہروڑنا گمانی ویل آتا ایسری کن اسہ کمیٹی اس ٹہیفک۔ میونسپل کہول آ اسٹال خلنگ نا مسخت لس مخلوق ءِ فائدہ تننگ ءِ۔ پی ایس ایم اے و صوبائی حکومت آتے پارت کننگانے کہ او نیزگار آتسکان بورہ نا رسینگ ءِ پک کیر۔ اسٹال آتیا بورہ 130 روپئی فی کلو نا حساب اٹ بہامریک۔ داگام گیج ءِ روچہ مبارک اٹی بورہ نا فراوانی ءِ گچین کننگ و الس ءِ ریلیف فراوان کننگ کن کننگانے۔ بنجائی حکومت نا عزم ءِ کہ ہروڑنا گمانی کاختی یا ویل آتے دمدستی وڑاٹ ایسر کننگک۔
