اسلام آباد۔ 21 فروری (اے پی پی) وزیراعظم محمد شہباز شریف ریٹیلر آتا ویل آتا ایسری کن کمیٹی اس ٹہیفنگ نا پارت کرساپارینے کہ ہمو ریٹیلر آک ہرا خراج نیٹ اٹی ساڑی ءُ اوفتیا خراج نا پین بھاریم شاغنگپک، کاریم اٹ اتوک آ گڑاتا آڑاٹی مروک آ اسمگلنگ نا توننگ کن ہم گام گیج کننگ انگ ءِ۔ وزیراعظم آفس نا میڈیا ونگ آن جاری بیان نا داخیال آتا درشانی ءِ او پاکستان ریٹیل بزنس کونسل نا چیئرمین زیاد بشیر نا کماشی ٹی ڈل اتون گپ وتران کرسا کرے ہراجمعہ نادے آ داڑے اوڑتون اوڑدہی کریر۔ اوڑدہی ٹی چیئرمین پاکستان ریٹیل بزنس کونسل زیاد بشیر ، شاہد حسین سی ای او سروس سیلز کارپوریشن، شہریاربخش سی ای او بیچ ٹری اتون اوار اوار بنجائی وزیر احسن اقبال، جام کمال خان، احدخان چیمہ، محمد اورنگزیب، رانا تنویرحسین، وزیرِ مملکت علی پرویز ملک و تعلقدار بڑزکو کمامدارآک ساڑی ئسر۔ وزیراعظم ریٹیلر آتا ڈل انا خیرمقدم، ویل آتا ایسری نا باوری کرفے وپارے کہ ہمو ریٹیلرآک ہرا خراج نیٹ اٹی ساڑی ءُ اوفتیا خراج نا پین بھاریم شاغنگپک۔ ہمو غٹ ریٹیلر آک ہرا خراج ہرافک خراج تفسہ اوفتے خراج نیٹ اٹ اتنگ کن اولیتی بنداو تیا گام گیج کننگ انگءِ۔ وزیراعظم پارے کہ کاریم اٹ اتوک آ گڑاتا آڑاٹی مروک آاسمگلنگ نا توننگ کن ہم گام گیج آتے ترند کننگ انگ ءِ۔ ہندی صنعت ءِ جدت ءِ تینا کرسا تینا گڑاتا برآمد آتیکن پوسکن آ ٹیکنالوجی ءِ تینا کننگے تانکہ او جہانی مارکیٹ نا مقابلہ ءِ کننگ کیر۔ ایف بی آر نا ایلو اصلاحات آتون اوار اوار حکومت زرگزران ءِ کیش لیس جوڑ کننگ کن گام گیج کننگ ءِ۔ اوڑدہی ٹی ڈل انا باسک آک ملکی زرگزران نا سوگوی کن وزیراعظم و اونا ٹیم ءِ خراج تحسین پیش کریر و پاریر کہ کبینی و شرح سود اٹی خاطرخواہ کمتی آن مصنوعات آتا کھپت و پیدوار اٹی ودکی مننگ ءِ ہراستاکڑزک۔ اومیت ءِ دا گام گیج آتیان کبینی نا کچ اٹی پین کمتی بریک۔ صنعت آتا پہیہ چلینگ انگ آن روزگار نا پوسکن ءُ وارخواہی ودی مننگ ءِ۔ حکومتی اصلاحات ستاکڑزوک ءُ و اوفتا زرگزران آ دورس مثبت اثرمرتب مریک۔ ریٹیلر آتے خراج نیٹ اٹ اتنگ آن محصولات آتیٹی ودکی مریک۔ ہموریٹیلر آک ہرا خراج نیٹ اٹی ساڑی ءُ اوفتا ویل آتا ایسری کن حکومتی گام گیج آتا معترف ءِ۔
