ریاض۔ 21 فروری (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پاکستان وبحرین نا نیام اٹ میڈیا کمکاری ءِ ودفنگ ، مہارت آتا ہل و تس و اسیجائی ڈٹ آتے مون آدننگ نا عزم انا درشانیءِ کرسا پارینے کہ پاکستان نا زرگزران سہی کنڈآہِننگ اٹی ءِ، جہانی زرکارآتیکن پاکستان اٹ زرکاری نا جوان ءُ موقع اسے۔ داہیت ءِ او سعودی میڈیا فورم نا وخت آ بحرین نا وزیرحوالکاری رمضان بن عبداللہ النعیمی تون اوڑدہی ٹی گپ وتران کرساپارے۔ بنجائی وزیر حوالکاری پارے کہ پاکستان وبحرین نا ایلمی تعلقداری بے کچ سوگو ، اسیجائی عقیدہ، تاریخ و دودوربیدہ غا تالان ءِ۔ اوپارے کہ ہڑتوم آ ملک آتا نیام اٹ میڈیا نا بشخ آتیٹی رابطہ غاتے پین سوگو کننگ کن میڈیا ڈل آتا ہن و بر اہمیت تخک۔ بنجائی وزیر بحرین وپاکستان نا اسٹیٹ میڈیا ادارہ غاتا نیام اٹ کمکاری نا مون آ دننگ نا گرج آ زور شاغسا بحرین نا نیوز ایجنسی بی این اے و پاکستان نا سرکاری نیوز ایجنسی اے پی پی نا نیام اٹ خبر آتا شریداری نا سلاہ تس۔ ہڑتوم آکنڈآک ساڑی آ سال تیٹی بڑزکو کہولی ڈل آتا باقاعدہ ہن وبرنا خیرمقدم ءِ کرے۔ بنجائی وزیر پارے کہ ساڑی آ دے تیٹی بحرین نا پارلیمانی ڈل پاکستان نا دورہ ءِ کرے و وزیراعظم محمد شہباز شریف تون اوڑدہی کرے ہراہڑتو م آ ملک آتا نیام اٹ تعلقداری نا سوگوی نا درشانی ءِ۔ اوپارے کہ پاکستان نا زرگزران سہی کنڈآ ہِننگ ءِ، جہانی زرکارآتیکن پاکستان اٹ زرکاری نا گچین ءُ موقع اسے۔ داوخت آ بحرین نا وزیرحوالکاری پارے کہ پاکستان تون تعلقداری ءِ قدر انا نظر اٹ ہرنہ۔ اوپارے کہ بحرین و پاکستان نا تعلقداری سرکڑدہ غاتا دانشمندانہ راہشونی نا رداٹ چندی بشخ آتیٹی پدریسہ شون ہلنگءِ۔ بحرین نا وزیرحوالکاری میڈیانا بشخ اٹی کمکاری ءِ پین سوگو کننگ و اسیجائی سرسہبی تا مون آ دننگ کن بحرین نا عزم انا درشانی ءِ کرے۔
