ریاض۔ 20 فروری (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پارینے کہ سعودی عرب نا وژن 2030ء عملی دروشم اس اختیارکرینے، فیک نیوز و مس انفارمیشن غٹ آن بھلا خطرہ وچیلنج ءِ ہرا راجی ویل آتا سوب جوڑمریک، ننے دا چیلنج نا ایسر اس پٹنگ نا گرج ءِ، شونداری کن کمکاری بھاز المی ءِ، شونداری و گچینی نا گنجائشت مدام سلک، سوشل میڈیا غا مصنوعی ذہانت نا کاریم اٹ اتنگ منصفانہ بایدے مرے، پاکستان اٹ میڈیا ءِ پوسکن آخواست آتون ہم گرنچ کننگ انگ ءِ، جہانی میڈیا ادارہ غاتون شریداری فائدہ ئی و مثبت ءُ گام اس جوڑ مننگ کیک، غزہ کون آ جہانی ویل آتا بارواٹی سہی و حقی معلومداری نا فراوانی المی ءِ تانکہ دنیا ہموڑے مروک آ ظلم آتیان معلومدار مننگ کے۔ داخیال آتا درشانی ءِ او سعودی میڈیا فورم 2025ء نا رداٹ ’’علاقائی و جہانی میڈیانا نیام اٹ شریداری ہندی میڈیا ءِ ہراوڑمون آدننگ کیک؟ نا سرحال آ اڈہلوک شرہ ٹی کرے۔ داوخت آ ایلو ترانکارآتیٹی ایف آئی پی پی نا سی ای او آلسٹیئر لیوس، ایس آرایم جی تھنک نا منیجنگ ڈائریکٹر نیدالمبارک ، میڈیا ڈائریکٹر، گورنمنٹ ریلیشنز ایکسپرٹ و چیئرمین بورڈ آف ڈائریکٹرز ایس ایم ایف اینیمیشن یولیانا سلاشیو ائسک اوار ئسر۔ بنجائی وزیر حوالکاری پارے کہ سعودی عرب نا وژن 2030ءسعودی ولی عہد نا شاندار ڈٹ ءِ ہرا عملی دروشم اس اختیارکرینے۔ سعودی عرب آ برسا داوژن نا احساس مریک۔ اوپارے کہ ننا چکار اسہ متحرک میڈیا سے آٹی ءِ ہرا پوسکن آخواست آتون ہم گرنچ مرے ہراٹی میڈیا نا بابت غٹ جہت آتے مون آ تخنگے۔ اوپارے کہ پاکستان 24 کروڑ الس نا گل زمین ءِ ہراٹی 18 کروڑ الس آن لائن سروس آتون گنڈوک ءُ، ننا متحرک آبادی نا 60 درسد بشخ 30 سال آن کم وئی ورناتیا تالان ءِ۔ بنجائی وزیر پارے کہ نن وادی سندھ انا متکن آ تہذیب امین اُن ہرانا مسکن دریائے سندھ نا کنارہ غاتیائس۔ ننتون بِنفنگ کن گچین ءُ کِسہ ارے، پاکستانیک نئے بیرہ شاندار قوم ءُ بلکن کے ٹو کون آ دنیا نا ارٹ میکو بھلا چوٹی تا محافظ ءُ۔ اوپارے کہ پاکستان اٹی ننا بنداوی چکار اسہ متحرک و جدت پسند میڈیاغاٹی ءِ ہرا نئے بیرہ چندی ویل آتے تالان کے بلکن الس نا پبی نمائندگی ءِ کے و اسل کسب و ٹیلنٹ ءِ مون آ دننگ نا وارخواہی فراوان کے۔ اوپارے کہ اسیجائی کمکاری نا کمک اٹ دنیا تون ہم گام مننگ کیک، اسہ ملک اسے ٹی رہینگ انگ و گپ وتران یا کمکاری کننگ نا قابل مفننگ گڑاتے توننگ نا مترادف ءِ، شونداری و گچینی نا گنجائشت مدام سلک۔ بنجائی وزیرپارے کہ سعودی ریسرچ اینڈ میڈیا گروپ (ایس آرایم جی) نا ببت ننتون اردو نیوز، عرب نیوز، انڈیپنڈنٹ اردو ساڑی ءِ ہرابھاز جوان کاریم کننگ ءُ۔ اوفتا نئے بیرہ ڈیجیٹل پلیٹ فارم بلکن ننا راج اٹی راجی ویل آتیا بیداری ودی کننگ اٹ ہم اہم کڑد ءِ۔ عطاء اللہ تارڑ میڈیا ادارہ غاتیٹی کمکاری نا مون آدننگ، ہندی میڈیا ءِ مہارت نا شونداری و تینا لائخی تے ودفنگ نا گرج آ زور شاغسا پارے کہ جہانی شریدار آتون دوملفنگ ہندی میڈیا ادارہ غاتیٹی اسہ بے مٹ ءُ بدلی اس اتنگ کیک۔ اوپارے کہ ننا پالیسی ءِ کہ نن دا مفاہمت آتے پین مون آدین۔ اوپارے کہ ننتون آسکر ایوارڈ یافتہ شرمین عبید چنائے، نوبل انعام یافتہ ملالہ یوسفزئی و زالبول کوہ پیما ثمینہ بیگ ساڑی ارے، شرمین عبید شاندار و دستاویزی فلم جوڑ کرسا آسکرایوارڈ ءِکٹا، ملالہ یوسفزئی تعلیمی کارندہ ءِ، وخت اس کہ ثمینہ بیگ اسٹ انگا زالبول ءِ ہراماؤنٹ ایورسٹ و کے ٹو تون اوار دنیا نا ہفت بڑزکو انگا چوٹی تے سرکرے، دا زالبول آک ننا گمرءُ، داوڑنا کِسہ غاتے دنیا نا مون آ اتنگ نا گرج ءِ، دا کِسہ غاتیٹی بے لوث قربانی، کسب، درستی راستی، پوسکن آ بڑزی تسکان سرمننگ نا است خواہی ءِ۔ بنجائی وزیرپارے کہ پاکستان اٹی بے پناہ ٹیلنٹ ساڑی ءِ، دا ٹیلنٹ ءِ تیار کننگ کن ننے جہانی شریدار آتا کمکاری نا گرج ءِ۔ اوپارے کہ پاکستان اٹی بھاز جوان نیوز و تفریحی چینل ارے، ہندی میڈیا نا شونداری کن ننے جہانی شریدار آتا گرج ءِ، ہرا ہندی میڈیا ءِ اوفتا حقی لائخی تسکان سرکننگ اٹ کمکارمرے۔ بنجائی وزیرپارے کہ سعودی میڈیا فورم اسہ ہندن ءُ پلیٹ فارم اسے ہراڑے نن پین کمکاری آ ہیت کننگ کینہ۔ عطاء اللہ تارڑ اسیجائی انسانی مسخت وہدف آتسکان سرکننگ نا گرج آ زور شاغسا پارے کہ جہانی کہول آ ہندن ءُ ویل ارے ہرافتے تالان کننگ المی ءِ، گڑاس وخت خبرآتیٹی ننے سہی عکس ملیپک، ہراتسکان غزہ نا ویل انا تعلق ءِ ننے دابارواٹی سہی آگاہی نا گرج ءِ کہ اسل ڈغاری حقائق آک انت ءُ، حالیت آک انت ءُ دنیا ءِ معلوم مننگ کے کہ ظلم انت اسے و غزہ نا مخلوق ءِ ہراوڑ نا انسانی کمک نا گرج ءِ۔ اوپارے کہ جہانی کمکاری نا کمک اٹ نن تینا لائخی تا گچین وڑاٹ درک ءِ خلنگ کینہ۔ اوپارے کہ ورلڈ اکنامک فورم نا رپورٹ اٹی ہراتم جہانی راہشون تیان اَرفنگاکہ ساڑی آ دور انا غٹ آن بھلا خطرہ و چیلنج انت ءِ تو اوفک ایٹمی جنگ، موسمیاتی بدلی و جان جوڑی نا خطرہ غاتا ذکر ءِ کتور بلکن اوفک فیک نیوز و مسن انفارمیشن ءِ غٹ آن بھلا خطرہ و چیلنج گوندار۔ اوپارے کہ جہانی کہول آ جہانی ادارہ اس بایدے مرے ہراڑتون حقائق آتا جاچ نا نظام مرے و مصنوعی ذہانت نا کمک اٹ معلومداری تا جاچ مننگ کے۔ اوپارے کہ فیک نیوز زیات ترندیاٹ تالان مریک، داچیلنج تون مون تننگ کن غٹ ءِ اواری اٹ ہیت و اونا ایسری اس کشنگ نا گرج ءِ۔ اوپارے کہ سوشل میڈیا غا گڑاس الگورتھم ءِ، ہراتم نن غزہ یا فلسطین نا بارواٹی پوسٹ کینہ تو او گڑاک دمدستی چٹرہ۔ اوپارے کہ سوشل میڈیا و مصنوعی ذہانت نا کاریم اٹ اتنگ دنیا نا غٹ مخلوق کن جوان و منصفانہ مرے، اودے بیرہ اسہ پلوآ کننگ مفک۔ ننے دابارواٹی منصفانہ نظام نا گرج ءِ۔ اوپارے کہ حقائق نا جاچ اکن جوان ءُ نظام اس بایدے مرے ہرا پک و قابل اعتبار مرے ہراڑآ مخلوق بھروسہ کننگ کے۔ عطاء اللہ تارڑ پارے کہ جہانی میڈیا ادارہ غاتا پاکستان نا ہندی میڈیا آؤٹ لیٹس آتون شریداری ستاکڑزک، داوڑنا شریداری آن شفافیت نا است بڈی مریک۔
