اسلام آباد۔ 20 فروری (اے پی پی) بنجائی وزیر داخلہ و انسداد منشیات محسن نقوی تون پاکستان اٹی قطر انا سفیر علی مبارک علی عیسی الخطیر اوڑدہی کرے ہراٹی تین پہ تینی است خواہی نا امور، ہڑتوم آکنڈآتا تعلقداری و چندی بشخ آتیٹی کمکاری ءِ ودفنگ آ گپ وتران کننگا۔ اوڑدہی ٹی قطر اٹی بند پاکستانی شاری تا یلہ کننگ و انسداد منشیات نا چرجوئی ٹی تین پہ تینی شریداری ءِ ودفنگ آ امنا کننگا۔ قطر انا سفیر وزیرداخلہ محسن نقوی ءِ قطر انا دورہ نا سلہ خلک۔ وزیرداخلہ محسن نقوی پارے کہ قطر اتون بھازخڑکی تعلقداری ءِ ، زوت قطر انا دورہ ءِ کرسا قطری ہم منصب تون اوڑدہی کیوہ۔ اوپارے کہ انسداد منشیات نا بابت خلیجی ملک آتا کانفرنس اپریل اٹی اسلام آباد اٹی مننگ ءِ۔ داکانفرنس اٹی قطر انا انسداد منشیات ڈیپارٹمنٹ نا سروک ءِ بشخ ہلنگ نا سلہ خلنگانے۔ وزیرداخلہ محسن نقوی داہیت آ زور شاغا کہ انسداد منشیات نا چرجوئی ٹی سنگت ملک آتون خڑکی شریداری خوانہ۔ قطر انا سفیر پارے کہ پاکستان ایلم اسلامی ملک ءِ، تعلقداری تے بھاز اہمیت ایتنہ۔
