اسلام آباد۔ 06 فروری (اے پی پی) بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال پارینے کہ موسمیاتی بدلی داوخت آ غٹ آن بھلو چیلنج ءِ، پاکستان نا شمار موسمیاتی بدلی آن غٹ آن زیات زہمی ملک آتیٹی مریک، نوکاپ نا سوب آن پاکستان ءِ ارب آ ڈالر نا نسخان مریک۔ داخیال آتا درشانی ءِ او پنچ شنبے نادے آ’’بریتھ پاکستان‘‘ جہانی چاگڑدی کانفرنس آن تران کرساکرے۔ اوپارے کہ حکومت داویل اتون مون تننگ کن سنجیدہ گام گیج کننگ اٹی ءِ۔ احسن اقبال موسمیاتی بدلی نا سوب پاکستان ءِ مون تروک چیلنج، دُن کہ گلیشیئرنا دِیرمننگ، ترند نوکاپ، ڈغار اٹی دِیر انا کمتی و باسنی نا ترند انگا لہر آتا ذکرءِ کرے۔ اوداحقیقت آ زور شاغاکہ اسہ ملک اس ہم تنیا موسمیاتی بدلی نا مقابلہ ءِ کننگ کپک و جہانی کہول آ اسیجائی کوشست آتا گرجءِ۔ اوپارے کہ پاکستان نا کنڈآن ’’اڑان پاکستان‘‘ ڈٹ انا پڑو کننگا، ہرانا رداٹ ہائیڈرو الیکٹرک پارک جوڑ کننگک، نوکاپ و ہیٹ ویونا پیشگی اطلاع نا نظام ءِ گچین کننگک، وکم کاربن نا کشوک آ ڈٹ آتیا چکار کننگک۔ داکان بیدس قومی چاگڑدی پالیسی و گرین اینڈ کلین پاکستان کون آ ہدف آتے ہم تالان کننگا۔ ہرانا مسخت آخبت نا چین تیکن اسہ جوان و رکھوک ءُ چاگڑد اس فراوان کننگ ءِ۔ اوپارے کہ دا گام گیج پاکستان نا چاگڑدی پائیداری نا کنڈآ اسہ مثبت پیش رفت اسے، ولے داٹی الس ، نجی بشخ و جہانی برادری نا کمکاری نا ہم بھاز گرج مریک۔
