اسلام آباد۔ 06 فروری (اے پی پی) وزیراعظم محمد شہباز شریف نجکاری نا عمل نا معینہ مد اٹی پوروی ءِ پک کننگ ناپارت کرسا پارینے کہ نجکاری نا عمل نا اوتینٹ چاروکی ءِ کننگ اٹی ءِ، اوٹی تعطل ءِ سگنگ پننگک۔ پنچ شنبے نادے آ وزیراعظم آفس نامیڈیا ونگ آن جاری بیان نا رداٹ داخیال آتا درشانی ءِ وزیراعظم تینا کماشی ٹی سرکاری ادارہ غاتا نجکاری نا عمل و اونا چاروکی نا بابت کروک آ ٹاسک مینجمنٹ سسٹم آ جاچ دیوان اٹی کرے۔ دیوان اٹی بنجائی وزراء عبدالعلیم خان، سینیٹر محمد اورنگزیب، راناتنویرحسین، احدخان چیمہ و تعلقدار بڑزکو کمامدارآک بشخ ہلکر۔ دیوان اٹی وزیراعظم ءِ نجکاری نا بابت کروک آ ٹاسک مینجمنٹ سسٹم نا جاچ پیش کننگا۔ دیوان ءِ چندی ادارہ غاتا نجکاری نا معینہ مد انا بابت ہم معلومدار کننگا۔ دیوان ءِ پاننگاکہ بنجائی حکومت نا ادارہ غاتا نجکاری ءِ مسہ ریسہ غاتیٹی بشخنگانے۔ اولیکو ریسہ ٹی 10 ادارہ، ارٹ میکو ریسہ ٹی 13 وخت اس کہ مسٹ میکو ریسہ ٹی ایلو ماندہ ادارہ غاتا نجکاری ءِ پک کننگک۔ دیوان اٹی وزیراعظم نجکاری نا عمل ءِ ترندکرسا معینہ مد اٹی نجکاری ناعمل نا پوروی ءِ پک کننگ نا پارت کرے۔ وزیراعظم پارے کہ پاکستان نا شونداری کن غٹ ءِ اواری اٹ کاریم کروئی ءِ، پاکستانی الس نا نہادی وسیلہ غاتانسخان کروک آ ادارہ غاتیٹی پین زیان نا موکل تفرہ۔ وزیراعظم پارے کہ ملکی ادارہ غاتانجکاری حکومت نا اڑان پاکستان گام انا بشخ ءِ، حکومت ناکاریم کاروبار کننگ اف بلکن کاروبار و زرکاری کن پالیسی، گام گیج و آسراتی فراوان کننگ ءِ۔ وزیراعظم پارے کہ وخت آ المی اصلاحات اٹ زرگزران نا گچینی نا کنڈآ ترندی اٹ ہِننگ ءِ، متعین کروک ادارہ غاتانجکاری نا عمل ءِ شفافیت آ سمجھوتہ کننگ آن بیدس ترند کننگے۔ وزیراعظم پارت کرے کہ نجکاری نا عمل اٹی کانودی اڑاند آتے مر کننگ کن گچین شہرت نا وکیل آتا خذمت ءِ ہلنگے۔ اوپارے کہ نجکاری نا عمل نا تینٹ چاروکی ءِ کننگ اٹی اُٹ، تعطل ءِ منپنہ۔ وزیراعظم نجکاری نا عمل نا چاروکی ءِ کننگ کن جوڑ کروک ٹاسک مینجمنٹ ڈیش بورڈ انا ہم جاچ ءِ ہلک۔
