اسلام آباد۔ 06 فروری (اے پی پی) بنجائی وزیر خزانہ و محصولات سینیٹر محمد اورنگزیب پنچ شنبے ناد ے آ داڑے مسکوہی وزراء خزانہ شاہد جاوید برکی و شمشاد اخترتون جتا جتا اوڑدہی کرے۔ وزارت خزانہ غان جاری بیان نا رداٹ اوڑدہی تیٹی ملک انا زرگزرانی شونداری، زرگزران نا سوگوی نا بحالی وپائیدار زرگزرانی شونداری کن حکومتی کوشست آتا بارواٹی گپ وتران کننگا۔ شاہد جاوید برکی و شمشاد اختر(ہرا مالی و زرگزرانی امور اٹی تینا مہارت و کماشی کن پنی ءُ) تینا گیشتر آزموندہ غاتے مون آتخسا نہادی سلاہ تسر۔ اووزیرخزانہ سینیٹر محمد اورنگزیب نا زرگزرانی بحالی نا بابت کوشست آتیٹی تعمیری مشورہ فراوان کریر۔ وزیرخزانہ ہڑتوم آ معاشیات نا چاہندارآتا ادارہ سازی، زرگزرانی پالیسی و چندی حیثیت آتیٹی زرگزرانی انتظام نا بشخ آتیٹی نمان خذمت آتا ستاءِ کرے۔ اوپارے کہ ہڑتوم آ شخصیت آک ملکی مالیاتی منظرنامہ نا ٹہیفنگ و پنی آ مالیاتی و تعلیمی ادارہ غاتیٹی تینا خذمت آتے سرتسر۔ اوناپاننگ ئس کہ شاہد جاوید برکی و شمشاد اختر کون آ آزموندہ کار چاہندار آتا راہشونی و سلاک زرگزرانی پالیسی تے پین گچین کننگ اٹ کمکار مریرہ۔اوداہیت آ زور شاغا کہ ملک انا زرگزرانی شونداری کن غٹ شریدار آتا اسیجائی کوشست آتا گرج ءِ۔ ہڑتوم آ معاشیات نا چاہندارآک حکومت نا کنڈآن زرگزرانی سوگوی کن کروک آ گام گیج آتا ستاءِ کریر و آخبت اٹ ہم کمکاری نا عزم ظاہرکریر۔ اوڑدہی ٹی وزارت خزانہ نا ایلو بڑزکو کمامدارآک ہم ساڑی ئسر۔
