اقوام متحدہ۔9جنوری (اے پی پی): پاکستان ءَ شمالی کوریا ءِ نیمگ ءَ ہائپرسونک بیلسٹک میزائل ءِ نوکیں آزمائش ءِ سر ءَ جیڈھ ءِ درشانی کتگ ءُ کوریا ءِ جزیرہ نما ءِ دیم ءَ اوشتاتگیں جیڈھ آناں گیواری ءِ واستہ سفارتی رابطہ ءُ گپ ءُ تران ءِ لوٹ کتگ۔ اقوام متحدہ ءِ تہ ءَ پاکستان ءِ مستقل نمائندہ منیر اکرم ءَ اقوام متحدہ ءِ سلامتی کونسل ءَ گوں تران کنان ءَ گوشت کہ ما ھمگرنچیں فریق آنی نیام ءَ گپ ءُتران ءِ پدا بندات کنگ ءِ لوٹ آنی مھکمیں حمایت ءَ کناں۔ سلامتی کونسل ءِ دیوان شمالی کوریا ءِ میزائل آزمائش ءَ چہ دو روچ ءَ پد برجم دارگ بوتگ۔ پاکستانی نمائندہ ءَ اے دیمروئی ءَ را دمگی ءُ میاں اوستمانی امن ءُ ایمنی ءِ واستہ تاوان لیک اتگ۔ آئی ءَ گوشت کہ پاکستان ءَ کوریا ءِ جزیرہ نما ءِ ھلاس کنگ، اقوام متحدہ ءِ سلامتی کونسل ءِ ھمگرنچیں قرارداد آنی سر ءَ عمل کنگ ءُ جھان ءِ تہ ءَ ایٹمی توان ءِ ھلاسی ءُ بے سلاہ کنگ ءِ مول ءُ مراد آنی سر ءَ عمل کنگ ءِ حمایت کتگ پاکستانی نمائندہ ءَ گوشت کہ یک نیمگ ءَ میزائل آزمائش چوشکہ اشتعال انگیز کارروائی آنی سر ءَ . یک نیمگے ءُ دومی نیمگ ءَ زوراکی ءِ کار ءُ دھمکی ھلاس بہ بنت۔ آئی ءَ گوشت کہ پاکستان کوریا یا دگہ جاگہ ءَ گیش ایٹمی سلاہ آنی آزمائش آنی ھلاپ ءَ انت۔ اے درگت ءَ آئی ءَ سرجمیں فریق آنی سر ءَ زور پر دات کہ آ وتی حمل ءَ بہ دار اَنت ءُ استیں کش ءُ چیل ءَ را گیش مہ کن اَنت۔ آئی ءَ سلامتی کونسل ءَ چہ لوٹ کتگ کہ آ فریقین ءِ نیمگ ءَ لہتیں اعتماد سازی ءِ گامگیج آنی زورگ ءِ سر ءَ ھیال ءُ لیکہ بہ کنت تانکہ کش ءُ چیل ءِ تہ ءَ کمی بہ بیت۔ آئی ءَ گیش گوشت کہ پاکستان کوریا ءِ جزیرہ نما ءَ امن ءُ ایمنی ءِ دیمروئی ءِ واستہ اقوام متحدہ ءِ قرارداد آنی تہ ءَ جوڑ بوتگیں فریم ورک ءِ تہ ءَ کار کنگ ءِ واستہ جزم اِنت مارا اُمیت اِنت کہ سلامتی کونسل دمگ ءَ گپ ءُ تران ءِ بحالی ءُ کش ءُ چیل آنی تہ ءَ گیشی ءِ واستہ گامگیج چست کنت۔ امن ءُ ایمنی ءِ ھاترا ھترہ آناں کم کنگ ءِ راہ ءُ درانی شوھازگ ءَ آئی ءِ کرد ءِ سرا چمشانک دیگ بوتگ۔
