اسلام آباد۔3جنوری (اے پی پی): جماعت علماء اسلام ءِ سروک مولانا فضل الرحمن ءَ گشتگ کہ سیاسی گلانی نیام ءَ گپ ءُ تران جمہوری عمل ءِ سک باز المی ئیں بہر انت، مذاکرات ءَ چہ بچگ ءُ گپ ءُ تران ءَ چہ انکار کنگ غیر جمہوری رویہ انت۔ آئی ءَ اے گپ سرکاری اتحاد ءِ گپ ءُ تران کمیٹی ءِ جارکش ءُ مسلم لیگ ءِ سروک سینیٹر عرفان صدیقی ءَ گوں گپ ءُ تران کنان ءَ کت آئی ءَ جمعہ ءِ روچ ءَ مولانا فضل الرحمن ءِ گس ءَ آئی ءَ گوں گند ءُ نند کت ءُ آئی ءِ جاور ھال ءِ بابت ءَ جست ءُ پرس کت۔ مولانا فضل الرحمن ءَ گوشت کہ مزنیں جیڈھ ایوک ءَ یکجا نندگ ءُ یک دومی ءَ گوں گپ ءُ تران ءَ چہ گیش ءُ گیوار بوت کن انت۔ آئی ءَ گوشت کہ پاکستان ءَ ھمک پڑ ءَ استحکام ءُ وت مہ وتی یکوئی ءِ ضلورت اِنت ایشی ءِ واستہ سیاسی یکوئی المی اِنت۔ سینیٹر عرفان صدیقی ءَ مولانا فضل الرحمن ءَ گپ ءُ تران ءِ عمل ءِ دیمروئی ءِ بابت ءَ سرپد کت۔ آئی ءَ مولانا فضل الرحمن ءِ مدرسہ دینی رجسٹریشن ءِ جیڈھ ءَ را دوستانہ رنگ ءَ گیش ءُ گیوار کنگ ءِ کوشست آناں ساڑات۔
