اسلام آباد۔28دسمبر (اے پی پی):سرکاری کمیٹی ءِ باسک سینیٹر عرفان صدیقی ءَ پاکستان تحریک انصاف ءَ را زور پر داتگ کہ آ سیاسی استحکام ءِ واستہ سرکاری کمیٹی ءِ گوما وتی گند ءُ نند ءَ را منطقی آسر ءِ سر ءَ سر کنگ ءِ سر ءَ دلگوشی بہ دنت۔ شمبے ءِ روچ ءَ یک انٹرویو ءِ تہ ءَ سینیٹر عرفان صدیقی ءَ کمیٹی ءِ باسک آناں زور پر دات کہ آ سوزناکیں سرکاری بیان آنی تہ ءَ چہ بہ رک اَنت ءُ وتی کوشست آنی تہ ءَ چہ بامرد ءُ منطقی آسر آنی رسگ ءِ سر ءَ دلگوش بہ کن اَنت۔ ایشی ءَ ابید سینیٹر عرفان صدیقی ءَ جار جتگ کہ دوئیں کمیٹی آنی کمک ءَ گوں گیشیں گپ ءُ تران ءِ واستہ 2 جنوری ءِ روچ ٹھینگ بوتگ۔ آئی ءَ اے گپ پدر کت کہ اے دیوان گڈی نہ بیت بلے اگاں بوت کنت گڈا جیڈھ آناں ترندیں رنگ ءَ گیش ءُ گیوار کنگ ءِ ھاترا پچیں لیکہ ءِ درشان کنگ بیت۔ فوجی آمید گس ءِ پیسلہ ءِ بابت ءَ یک جُستے ءِ سر ءَ سینیٹر عرفان صدیقی ءَ آئینی رھبند ءِ تہ ءَ کار کنگ ءُ ادارگ آناں نشانگ جوڑ کنوکیں جنجالی بیان آنی تہ ءَ چہ رکگ ءِ سر ءَ زور پر دات۔ دگہ جُستے ءِ سر ءَ آئی ءَ پی ٹی آئی ءَ را دل یکیمی داتگ کہ اگاں عمران خان لوٹ ایت گڈا کمیٹی عمران خان ءَ گوں گپ ءُ تران ءَ را آسراتی دنت چوشکہ گوستگیں گند ءُ نند ءَ اجازت بوتگ۔ مسلم لیگ ن ءَ گپ ءُ تران ءِ واستہ ھچ وڑیں پیش شرط ایر نہ کتگ ءُ ایشی ءِ بدل ءَ سول نافرمانی ءِ لوٹ کنگ ءَ ابید ھم اپوزیشن ءَ را پرامن گپ ءُ تران ءِ پلیٹ فارم ءِ پیشکش کتگ۔ عرفان صدیقی ءَ اے گپ ءِ سر ءَ ھم زور پر دات کہ اے موڑ ءَ سیاسی استحکام ءِ برجائی سک باز المی اِنت پرچا کہ پاکستان مسلم لیگ ن ءِ سرکار راستیں راہ ءَ گامگیج آناں دل یکیمی کنگ ءَ اِنت۔
