مزن وزیر محمد شہباز شریف ءُ بنگلہ دیش ءِ چیف ایڈوائزر ڈاکٹر محمد یونس ءَ گند ءُ نند کتگ، دو نیمگی کمک ءَ را گیش کنگ ءِ سر ءَ تپاک کتگ

قاہرہ۔19دسمبر  (اے پی پی): پاکستان ءُ بنگلہ دیش ءَ دو نیمگی سیادی آنی تہ ءَ انوگیں جوانیں دیمروئی ءُ مزن تک ءِ رابطہ آنی تہ ءَ گیشی ءِ سر ءَ وشھالی ءِ درشان کنان ءَ وت مہ وتی مفاد ءِ دراھیں شوبگ آنی تہ ءَ دو نیمگی کمک ءَ را گیش کنگ ءِ سر ءَ تپاک کتگ۔ ڈی ہشت سروک دیوان ءِ موہ ءَ مزن وزیر محمد شہباز شریف ءُ راجی جمہوریہ بنگلہ دیش ءِ چیف ایڈوائزر پروفیسر ڈاکٹر محمد یونس ءَ گوں گند ءُ نند کت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دوئیں سروک آنی نیام ءَ اے گند ءُ نند پاکستان ءُ بنگلہ دیش ءِ استیں نیک راھی ءُ براتی سیادی آنی راستیں آدینک انت۔ گند ءُ نند ءَ مزن وزیر محمد شہباز شریف ءَ دوئیں ملک آنی نیام ءَ راجدپتری، مذہبی ءُ دود ءُ ربیدگی سیادی آنی سر ءَ زور پر دات ءُ دو نیمگی کمکی ھاسیں رنگ ءَ بیپار، مردم آنی نیام ءَ رابطہ ءُ دود ءُ ربیدگی تبادلہ آنی دیمروئی ءِ واستہ پاکستان ءِ واھشت ءِ درشان کت۔ مزن وزیر شہباز شریف ءَ اقتصادی کمک ءِ نوکیں راہ آنی شوھازگ ءِ واستہ یکجائی کوشست کنگ ءِ ضلورت ءِ سر ءَ زور پر دات، ھاسیں رنگ ءَ کیمیکلز، سیمنٹ کلنکر، سرجیکل انسٹرومنٹس، چمڑی ءِ چیز ءُ آئی ٹی ءِ شوبگ آنی تہ ءَ وت مہ وتی تجارت ءِ دیمروئی ءِ واستہ مزنیں گنجائش ءَ چہ پائدگ چست کنگ ءِ ضلورت ءِ سر ءَ زور پر دات۔ مزن وزیر شہباز شریف ءَ پاکستان ءُ بنگلہ دیش ءِ نیام ءَ بیپار ءُ سفر ءِ آسراتی ءِ واستہ گوستگیں گامگیج آنی سر ءَ بنگلہ دیش ءِ منت گپت، ایشی ءِ تہ ءَ پاکستان ءُ ڈھاکہ ءَ چہ آیوکیں سامان آنی 100درسد جسمانی چار ءُ تپاسی ءِ لوٹ ءِ ھلاس کنگ ھوار اِنت۔ ایشی ءِ تہ ءَ بالی پٹ ءَ پاکستانی مسافر آنی چیک کنگ ءِ ھاترا ھاسیں سیکورٹی ڈیسک ءِ ھلاس کنگ ھم ھوار اِنت۔ مزن وزیر ءَ پاکستانی ویزہ ءِ درخواست کنوک آنی واستہ گیشیں کلیئرنس ءِ لوٹ ھلاس کنگ ءِ سر ءَ بنگلہ دیش ءِ ھم شگر ءُ منت گپت۔ دوئیں رہشون آں دو نیمگی سیادی آنی تہ ءَ انوگیں جوانیں دیمروئی ءُ مزن تک ءِ رابطہ آنی تہ ءَ گیشی ءِ سر ءَ ھم دل یکیمی ءِ درشان کت۔ وت مہ وتی مفاد ءِ درستیں پڑ آنی تہ ءَ دو نیمگی کمک ءَ را گیش ءُ گیوار کنگ ءِ سر ءَ تپاک کت۔ ایشاں اے گپ ءِ سر ءَ ھم زور پر دات کہ دوئیں نیمگ ءَ چہ دیمروئی ءِ مول ءُ مراد آنی سرجمی ءِ ھاترا کوشست آناں یکجا کنگ ءِ ضلورت ھوار اِنت۔ دوئیں رہشوناں بنگلہ دیش ءِ کرکٹ ٹیم ءِ پاکستان ءِ تر ءُ تاب ءُ ڈھاکہ ءَ پاکستانی ازمکار آنی مراگش ءِ سر ءَ ھم وشی ءِ درشانی کت آھاں ڈی 8 ءَ ھوار جتا جتائیں کثیر نیمگی فورم آنی تہ ءَ کمک ءَ را گیش کنگ ءِ سر ءَ ھم تپاک کت۔