قاہرہ۔19دسمبر (اے پی پی): پاکستان ءُ بنگلہ دیش ءَ دو نیمگی سیادی آنی تہ ءَ انوگیں جوانیں دیمروئی ءُ مزن تک ءِ رابطہ آنی تہ ءَ گیشی ءِ سر ءَ دل یکیمی ءِ درشانی کتگ ءُ وت مہ وتی مفاد ءِ توامیں پڑ آنی تہ ءَ دو نیمگی کمک ءَ را گیش کنگ ءِ سر ءَ تپاک کتگ۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ڈی 8 سروک دیوان ءِ موہ ءَ مزن وزیر محمد شہباز شریف ءُ راج دپتر بنگلہ دیش ءِ چیف ایڈوائزر پروفیسر ڈاکٹر محمد یونس ءِ نیام ءَ گند ءُ نند بوتگ۔ اے گند ءُ نند پاکستان ءُ بنگلہ دیش ءِ استیں نیک راھی ءُ براتی سیادی آنی راستیں آدینک انت۔ گند ءُ نند ءَ مزن وزیر محمد شہاز شریف ءَ دوئیں ملک آنی نیام ءَ راجدپتری، مذہبی ءُ دود ءُ ربیدگی سیادی آنی سر ءَ زور پر دات ءُ دو نیمگی کمک ءِ واستہ پاکستان ءِ واھشت ءِ درشان کت ھاسیں رنگ ءَ بیپار، مردم آنی نیام ءَ رابطہ ءُ دود ءُ ربیدگی تبادلہ آنی واستہ پاکستان ءِ واھشت ءِ درشان کت۔ مزن وزیر شہباز شریف ءَ اقتصادی کمک ءِ نوکیں راہ ءُ درانی شوھازگ ءِ واستہ یکجائی کوشست کنگ ءِ ضلورت ءِ سر ءَ زور پر دات، ھاسیں رنگ ءَ کیمیکلز، سیمنٹ کلنکر، سرجیکل انسٹرومنٹس، چمڑے ءِ چیز ءُ آئی ٹی ءِ شوبگ ءَ تانکہ پرائم ءَ را دیمروئی دیگ ءِ واستہ مزنیں گنجائش ءَ چہ پائدگ چست کنگ بہ بیت۔ وزیر شہباز ءَ پاکستان ءُ بنگلہ دیش ءِ نیام ءَ بیپار ءُ تر ءُ تاب ءِ آسراتی ءِ واستہ گوستگیں گامگیج آنی سر ءَ بنگلہ دیش ءِ منت گپت، ایشی ءِ تہ ءَ پاکستان ءَ چہ آیوکیں سامان آنی 100درسد جسمانی پٹ ءُ پول ءِ لوٹ ءِ ھلاس کنگ ءُ ایشی ءِ تہ ءَ ڈھاکہ ءِ بالی پٹ ءَ پاکستانی مسافر آنی اسکریننگ ءِ ھاترا جوڑ کتگیں ھاسیں سیکورٹی ڈیسک ءِ ھلاس کنگ ھم ھوار اِنت۔ مزن وزیر ءَ پاکستانی ویزہ ءِ درخواست کنوک آنی واستہ گیشیں کلیئرنس ءِ لوٹ ھلاس کنگ ءِ سر ءَ بنگلہ دیش ءِ ھم شگر ءُ منت گپت۔ دوئیں رہشون آں دو نیمگی سیادی آنی تہ ءَ انوگیں جوانیں دیمروئی ءُ مزن تک ءِ رابطہ آنی تہ ءَ گیشی ءِ سر ءَ ھم دل یکیمی ءِ درشان کت۔ وت مہ وتی مفاد ءِ توامیں پڑ آنی تہ ءَ دو نیمگی کمک ءَ را گیش ءُ گیوار کنگ ءِ سر ءَ تپاک کت۔ ایشاں اے گپ ءِ سر ءَ ھم زور پر دات کہ دوئیں نیمگ ءَ چہ دیمروئی ءِ مول ءُ مراد ءِ سرجم کنگ ءِ ھاترا کوشست آناں ھمگرنچ کنگ بہ بیت۔ دوئیں راہشوناں بنگلہ دیش ءِ کرکٹ ٹیم ءِ پاکستان ءِ تر ءُ تاب ءُ ڈھاکہ ءَ پاکستانی ازمکارانی کنسرٹ ءِ سرا ھم دل یکیمی ءِ درشان کتگ۔ دوئیں نیمگاں جتا جتائیں کثیر جہتی فورم آنی تہ ءَ کمک ءَ را گیش کنگ ءِ سر ءَ ھم تپاک کتگ، ایشی ءِ تہ ءَ D8 ھوار اِنت۔
