اسلام آباد۔17دسمبر (اے پی پی):سینیٹ ءِ درئی کارانی قائمہ کمیٹی ءِ چیئرمین سینیٹر عرفان صدیقی ءُ سینیٹر سرمد علی ءَ پاکستان ءَ ازبکستان ءِ سفارت خانہ ءِ تر ءُ تاب کتگ ءُ پاکستان ءَ ازبکستان ءِ سفیر علی شیر توختیف ءَ گوں چایر ءِ بستار ءَ گند ءُ نند کتگ۔ سینیٹ ءِ درئی کارانی قائمہ کمیٹی ءَ پاکستان ءُ ازبکستان ءِ نیام ءَ گیش بوھوکیں سیادی ءَ را ساڑات۔ آئی ءَ دوئیں ملک آنی نیام ءَ گیشیں سیادی آنی دیمروئی ءِ اسٹریٹجک ارزشت ءِ سر ءَ زور پر دات ھاسیں رنگ ءَ اقتصادی کمک، تجارت ءُ دود ءُ ربیدگی تبادلہ ءِ رد ءَ۔ پاکستان ءَ جمہوریہ ازبکستان ءِ سفیر علی شیر توختیف ءَ خطہ ءِ تہا پاکستان ءِ ھاسیں کرد ءَ را من اِتگ ءُ امن ءُ ایمنی ءِ دیمروئی ءِ واستہ پاکستان ءِ کوشست آناں ساڑاتگ۔ ایشاں پاکستان ءُ ازبکستان ءِ سیادی ءِ آیوکیں وھد ءِ بابت ءَ اُمیت ءِ درشان کت ءُ کمک ءَ را گیش کنگ ءِ واستہ جتا جتائیں گامگیج آنی سر ءَ تران کت ایشی ءِ تہ ءَ توانائی، کشت ءُ کشاری، وانگ ءُ زانگ ءُ سیل ءُ سواد ءِ وڑیں شوبگ آنی تہ ءَ یکجائی منصوبگ ھوار اَنت۔ سینیٹر سرمد علی ءَ ھم اے گپ ءُ تران ءَ بھر زرتگ ءُ کمک ءِ واستہ ھما موہ آنی سر ءَ دلگوشی داتگ کہ ایشی ءَ چہ دوئیں ملک آناں فائدگ رس ایت۔ آئی ءِ بصیرت ءَ مشترکہ مول ءُ مراد ءُ یکے دومی ءِ مفاد ءِ بابت ءَ گپ ءُ تران ءَ را گیش ءُ گیوار کت ءُ برجاھیں گپ ءُ تران ءُ کمک ءِ ضلورت ءِ سر ءَ زور دات۔ اے موہ ءِ سر ءَ میاں اوستمانی سیادی ءِ ماہر خالد تیمور اکرم ھم ساڑی ات۔
