اسلام آباد۔16دسمبر (اے پی پی): صدر آصف علی زرداری ءَ دمگ ءَ دریائی وسیلگ آنی رکھینگ ءُ نیلیں معیشت ءِ دیمروئی ءِ واستہ یکجائی کوشست آنی سر ءَ زور پر دات ءُ گوشت کہ پاکستان بحر ہند ءِ دمگ ءَ دریائی کمک ءِ دیمروئی ءِ واستہ جزم انت۔ دو شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ اے ھیالانی درشانی چین ءُ بحر ہند ءِ سیمی دمگی فورم ءَ نیلیں معیشت کمک ھوالگ ءَ ویڈیو گشتانک دیگ ءِ ساھت ءَ کت۔ اے دیوان ءِ بندوبست چین ءِ میاں اوستمانی دیمروئی کمک ءِ ادارگ چین ءِ شہر کنمنگ ءَ کنگ بوتگ۔ صدر ءِ مملکت ءَ گوشت کہ موسمی بدلی، آلودگی ءُ ماحولیاتی نظام ءِ ھراب کنگ ءِ وڑیں جیڈھ آناں گیواری کنگی اِنت، پاکستان میری ٹائم سیکٹر ءَ کمک ءَ را دیمروئی دیگ ءِ واستہ توامیں اسٹیک ہولڈر آنی گوما شریک بوھگ لوٹ ایت۔ صدر ءِ مملکت ءَ گوشت کہ پاکستان لوٹ ایت کہ مئے دمگ امن، دیمروئی ءُ برجائی ءِ گڑھ بہ بیت، آیوکیں جھان ءِ اقتصادی دیمروئی ءِ انحصار رودراتکی ملک آنی سر ءَ بیت۔ آصف علی زرداری ءَ گوشت کہ دگنیا ءِ مزنیں آبادی یے چین ءُ مئے دمگ ءِ ایندگہ ملک آنی تہ ءَ نشتگ ۔ آئی ءَ گوشت کہ دریا ءَ چہ سرجمی ءَ کارمرد کنگ ءِ واستہ یکجائی کوشست ءِ ضلورت انت۔ صدر ءِ مملکت ءَ یک ویڈیو کلوہ ءِ تہ ءَ بحر ہند ءَ امن ، دیمروئی ءُ برجائی ءِ واستہ پاکستان ءِ جزم ءِ پدا زور دات ءُ گوشت کہ پاکستان چین اقتصادی راہداری ءِ چیر دستی ءَ گوادر بندرگاہ ءَ را دیمروئی دیگ بوھگ ءَ انت۔ آئی ءَ گوشت کہ گوادر بندرگاہ ءَ را دمگی رابطہ ءِ واستہ مرکز ءِ رنگ ءَ مٹ کنگ بوھگ ءَ انت، تجارت ءُ گوادر بندرگاہ ءَ چہ سمندری اقتصادی دیمروئی ءَ را گہتر کنگ بیت۔ صدر ءِ مملکت ءَ پاکستان ءِ نیلیں معیشت ءِ دیمروئی ءِ واستہ پاکستان ءِ کوشست آنی سر ءَ ھم زور پر دات۔ آئی ءَ گوشت کہ پاکستان ءَ نیشنل میری ٹائم پالیسی ءِ بندات کتگ، پاکستان ءَ برجائی ماہی گیری ءُ دریائی رکھینگ ءِ واستہ گامگیج کنگ بوتگ۔ صدر ءِ مملکت ءَ گوشت کہ لیونگ انڈس پروجیکٹ ءِ وڑیں منصوبگ آنی مول ءُ مراد ماحولیاتی نظام ءِ رکھینگ، آلودگی ءِ ھلاپ ءَ جنگ اِنت۔ صدر ءِ مملکت ءَ فورم ءِ مول ءُ مراد آنی تہ ءَ پائیدار دیمروئی ءِ سر ءَ دلگوشی دیگ ءِ چین ءِ کوشست آناں ساڑات۔ صدر ءِ مملکت ءَ گوشت کہ صلاحیت سازی ءُ فورم ءِ ایجنڈا ءَ جزیرہ آناں ھوار کنگ وش اتک کنگ بیت۔
