بنجاھی وزیر ءِ اھوالکاری ءُ ترکیہ ءِ صدارتی سروک ءِ نیام ءَ گند ءُ نند، دوئیں ملک آنی یکجائی شنگ کاری، پاکستان ءَ ترک ڈرامہ آنی پیشدارگ ءِ تپاکی، وزارت ءِ اھوالکاری ءُ ترکیہ ءِ ڈائریکٹوریٹ ءِ نیام ءَ ورکنگ گروپ جوڑ کنگ ءِ بابت ءَ تپاک

استنبول۔14دسمبر (اے پی پی):وزارت ءِ اھوالکاری ءُ ڈائریکٹوریٹ ءَ پاکستان ءَ ارتغل غازی ءِ وڑیں ترک ڈرامہانی پیشدارگ ءِ سرا تپاک کتگ کہ ایشی ءِ تہا پی ٹی وی ءُ ترکیہ ءِ سرکاری ٹی وی چینل ”ٹی آر ٹی“ ءِ پاکستان ءُ ترکیہ ءِ نیام ءَ یکجائی شنگکاری ھوار انت۔ کارگس ءِ جوڑ کنگ ءُ دوئیں نیمگاں چہ یک فوکل پرسن ءِ نامزد کنگ ءِ سرا تپاک کنگ بوتگ۔ اھوالکاری ءُ شنگ کاری ءِ بنجاھی وزیر عطا اللہ تارڑ ءَ کہ اے وھد ءَ ترکیہ ءِ سرکاری تر ءُ تاب ءَ انت آئی ءَ گوں ترکیہ ءِ صدارتی رسانکدر ءِ سروک پروفیسر فہرتین التون ءَ گند ءُ نند کتگ۔ گند ءُ نند ءَ میڈیا ءِ شوبگ ءَ کمک ءَ را مھکم کنگ، سرکاری ڈپلومیسی ءِ دیمروئی، اسلاموفوبیا ءُ ردیں ھال آنی ھلاسی، میڈیا ءِ ڈل آنی مٹ ءُ بدلی ءُ یکجائی پروڈکشن آنی تیاری ءَ ھوار ھاسیں جیڈھ آنی سر ءَ ھیال ریچی کنگ بوت۔ اے موہ ءِ سر ءَ بنجاھی وزیر ءِ اھوالکاری ءَ تران کنان ءَ گوشت کہ پاکستان ءُ ترکیہ ءِ نیام ءَ راجدپتری ءُ براتی سیادی است انت، میڈیا ءِ شوبگ ءَ دوئیں ملک آنی نیام ءَ کمک ءِ سک باز امکان است انت، میڈیا ءِ کمک ءَ چہ السی تک ءَ سیادی گیش مھکم بنت۔ گند ءُ نند ءَ دلگوشی ءُ سیل ءُ سواد ءِ شوبگ ءَ کمک ءُ یکجائی منصوبگ آنی سر ءَ ھم گپ ءُ تران کنگ بوت۔ بنجاھی وزیر ءِ اھوالکاری ءَ گوشت کہ پاکستان ءُ ترکیہ ءِ نیام ءَ یکجائی پروڈکشن تیار کنگ ءَ چہ دوئیں ملک آنی دود ءُ ربیدگ آنی مٹ ءُ بدلی کنگ بیت۔ آئی ءَ گوشت کہ مارا نوجوان نسل ءَ را پاکستان ءُ ترکیہ ءِ راجدپتری سیادی ءَ چہ سرپد کنگی انت۔ بنجاھی وزیر ءِ اھوالکاری ءَ پروفیسر فھرتین الٹن ءَ را پاکستان ءِ تر ءُ تاب ءِ دعوت ھم داتگ۔ پروفیسر فہرتین التون ءَ پاکستان ءَ میڈیا ءِ دیمروئی ءِ ھوالگ ءَ سک باز دلگوشی ءِ درشان کت ءُ گوشت کہ ترک ڈرامہ ارطغرل غازی ءَ پاکستان ءَ سک باز نامداری رستگ۔ آئی ءَ گوشت کہ ترکیہ ءَ پاکستانی ازمکار ءُ موسیقار سک باز نامدار انت۔ آئی ءَ گوشت کہ دوئیں ملک آنی تہ ءَ میڈیا ءِ کمک ءَ چہ اسلاموفوبیا ءُ ردیں ھال آنی ھلاپ ءَ جنگ ءَ کمک رسیت۔ بنجاھی وزیر اھوالکاری عطا اللہ تارڑ ءَ ترکیہ ءِ میڈیا ءِ سر ءَ کشمیر ءِ کوریج ءِ سر ءَ پروفیسر فحرتین التون ءِ منت گپت۔