بنجاھی وزیر اھوالکاری ءُ شنگ کاری عطا اللہ تارڑ ءُ لبنان ءِ اھوالکاری ءِ وزیر زیاد میکیری ءِ نیام ءَ گند ءُ نند ءَ لبنان ءِ سرزمین یکوئی ءُ امن ءِ برجائی ءِ حمایت کنگ ءِ وتی جزم ءِ درشان

استنبول۔15دسمبر (اے پی پی): بنجاھی وزیر ءِ اھوالکاری، شنگکاری، راجی ورثہ ءُ دود ءُ ربیدگ عطا اللہ تارڑ ءَ لبنان ءِ سروکی ءِ منت گپت کہ آہاں بیروت ءِ راہ ءَ شام ءَ بندیں پاکستانی شہری آناں ترندیں درکنگ ءِ آسراتی داتگ ءُ گوشت کہ مزن وزیر شہباز ءِ کال ءِ سر ءَ لبنان ءِ مزن وزیر ءَ ترندیں گامگیج کتگ ءُ شام ءَ بندیں پاکستانی آناں ترندی ءَ چہ ریلیف داتگ کہ ایشی ءَ چہ مئے سیادی ءِ مھکمی ءِ پدر بوھگ ءَ اِنت، پاکستان لبنان ءِ گوما وتی سیادی ءَ را گیش مھکم کنگ ءِ واھشت مند اِنت۔ استنبول ءَ لبنان ءِ وزیر ءِ اھوالکاری زیاد مکری ءَ گوں گند ءُ نند ءِ ساھت ءَ بنجاھی وزیر ءِ اھوالکاری ءَ لبنان ءِ سرزمین ءِ یکوئی ءُ امن ءِ حمایت کنگ ءِ وتی عزم ءِ پدا زور دات۔ آئی ءَ گوشت کہ دوئیں ملک آنی مزن وزیر آنی نیام ءَ گپ ءُ تران ءَ چہ شام ءَ اوشتوکیں پاکستانی آنی وطن ءِ واتر بوھگ ءِ واستہ راہ پچ بوت، ایشی ءِ واستہ لبنان ءِ سرکار منت وار انت۔ آئی ءَ گوشت کہ پاکستان ءُ لبنان ءِ نیام ءَ براتی ءُ گرمیں سیادی است انت، پاکستان لبنان ءِ گوما وتی سیادی ءَ را گیش مھکم کنگ لوٹ ایت۔ بنجاھی وزیر ءَ گوشت کہ اے گرانیں وھد ءَ سرجمیں پاکستانی راج لبنان ءِ الس ءِ گوما اوشتاتگ۔ اے موہ ءِ سر ءَ لبنان ءِ وزیر ءِ اھوالکاری ءَ گوشت کہ پاکستان ءَ ھمک گرانیں وھد ءَ لبنان ءِ کمک کتگ۔ آئی ءَ گوشت کہ جنگ ءَ چہ آماچیں لبنان ءِ الس آناں کمکی سامان دیم دیگ ءِ واستہ مزن وزیر شہباز شریف ءُ پاکستان ءِ حکومت ءِ شگر ءُ منت وار آں۔ آئی ءَ گوشت کہ دوئیں ملک آنی نیام ءَ سیادی ءِ مھکمی ءِ درشانی ایش انت کہ پاکستان ءَ مشکلیں وھد ءَ لبنان ءِ الس آنی کمک کتگ۔ آئی ءَ گوشت کہ بیروت ءِ بالی پٹ ءَ پاکستانی آنی مزنیں کساس ءِ گندگ ءَ چہ وشی بوتگ کہ آ وطن ءَ واتر بوھگ ءَ انت۔ لبنان ءِ وزیر ءِ اھوالکاری ءَ دو نیمگی سیادی ءَ را گیش مھکم کنگ ءِ واستہ وتی جزم ءِ پدر کنگ ءَ انت۔