اسلام آباد۔13دسمبر (اے پی پی): بنجاھی وزیر تجارت جام کمال خان ءَ گوشت کہ پاکستان میاں اوستمانی ملک آنی واستہ تجارتی مرکز جوڑ بیت، ءُ تاجکستان ءِ گوما کاروباری سیادی ءَ را گیش دیمروئی دنت۔ اے ھیالانی درشانی آئی ءَ جمعہ ءِ روچ ءَ اسلام آباد چیمبر آف کامرس اینڈ انڈسٹریز ءَ پاکستان ءُ تاجکستان بزنس فورم ءَ گوں تران کنان ءَ کت۔ آئی ءَ گوشت کہ پاکستان ئُُ تاجکستان ءِ نیام ءَ بیپار ءِ راستیں گنجائش ءَ چہ پائدگ چست کنگ نہ بوت، کاروباری فورم بیپار ءِ دیمروئی ءِ تہ ءَ ھاسیں کرد پیلو کن اَنت۔ آئی ءَ گوشت کہ تاجکستان ءِ واستہ پاکستانی پروڈکٹ جوانیں کوالٹی ءِ اَنت، پاکستانی صنعت مزنیں کوالٹی ءِ انجینئرنگ سامان، ٹیکسٹائل ءُ سرجیکل انسٹرومنٹ جوڑ کنگ ءَ اِنت، مئے آئی ٹی ایکسپورٹ جھان ءِ تک ءَ نامدار بوھگ ءَ اِنت۔ بنجاھی وزیر ءَ گوشت کہ حکومت ءَ آئی ٹی ءِ شوبگ ءَ را دیمروئی دیگ ءِ واستہ ھاسیں گامگیج کتگ، ایشی ءِ پائدگ دیم ءَ آھگ ءَ انت۔ جام کمال ءَ گوشت کہ دوئیں ملک آنی نیام ءَ براہ راست بالی گراب آنی وسیلگ ءَ تجارت ءَ را گیش آسراتی رس ایت، تاجکستان ءِ گوما ترجیحی تجارتی معاہدہ ءِ گوما زوت بیت۔ آئی ءَ گوشت کہ پاکستانی بندرگاہ تاجکستان ءِ درآمد آنی واستہ جوانیں آسراتی پجاری کت کن اَنت، میاں اوستمانی ملک آنی گوما تجارتی میل آنی تہ ءَ بھر زوری ءَ را آسراتی دات کن اَنت۔ آئی ءَ گوشت کہ اقتصادی اشارہ گہتر بوھگ ءَ انت، مہنگائی ءِ تہ ءَ کمی اتکگ آئی ءَ گوشت کہ پاکستان ءَ سازگاریں سرمایہ کاری ءِ چاگرد جوڑ کنگ بوھگ ءَ انت ءُ ھاسیں سرمایہ کاری کونسل ءِ نیمگ ءَ چہ درملکی سرمایہ کار آناں رہشونی کنگ بوھگ ءَ انت۔ جام کمال ءَ گوشت کہ پاکستان ءِ جغرافیائی پوزیشن خطہ ءَ تجارت ءِ واستہ جوان انت، ما تاجکستان ءِ گوما اقتصادی کمک ءَ را گیش مھکم کن ایں، پاکستان جتاجتائیں شوبگ آنی تہ ءَ تاجکستان ءِ واستہ سرمایہ کاری ءِ موہ پیش کت کنت۔ آئی ءَ گوشت کہ دوئیں ملک آنی نیام ءَ مھکمیں شریکداری ءِ واستہ مرچیگیں دیوان المی اِنت، اے وڑیں کاروباری دیوان برجاہ بہ بنت۔
