استنبول۔13دسمبر (اے پی پی): بنجاھی وزیر اھوالکاری ، شنگ کاری ، راجی مڈی ءُ دود ءُ ربیدگ عطا اللہ تارڑ ءَ پاکستان ءُ ترکی ءِ نیام ءَ یکجائی مسلی تامُر انی جوڑ کنگ ءُ یکجائی شنگ کاری ءِ تجویز داتگ ءُ گشتگ کہ پاکستان ءُ ترکی ءَ بے دروریں ٹیلنٹ است انت۔ کسمانک ءُ مسلی تامُر پاکستان ءَ سک باز شنگ ءُ تالان انت۔ آئی ءَ اے گپ ترک نیشنل ٹی وی چینل ’’ٹی آر ٹی ورلڈ‘‘ ءِ بنجاہی کارگس ءِ تر ءُ تاب ءِ موہ ءَ ڈائریکٹر جنرل انٹرنیشنل براڈکاسٹ عمر فاروق تنی ویردی ءَ گوں گند ءُ نند ءِ ساھت ءَ کت۔ گند ءُ نند ءَ دوئیں ملک آنی نیام ءَ میڈیا ءِ کمک، یکجائی مسلی تامُر جوڑیشت ءُ سیل ءُ سواد ءِ دیمروئی ءَ ھوار وت مہ وتی دلپدردی ءِ ایندگہ بنگپ آنی سر ءَ ھیال ریچی کنگ بوت۔ بنجاھی وزیر ءِ اھوالکاری ءَ گوشت کہ پاکستان ترکی ءِ گوما براتی سیادی ءَ را ارزشت دنت، دوئیں ملک آنی نیام ءَ اے سیادی راجدپتری ءُ یکجائی مذھبی ءُ دود ءُ ربیدگی ارزشت آنی سر ءَ بنیات انت۔ آئی ءَ گوشت کہ ترکی ءِ حکومت ءِ گوما کسمانک، مسلی تامُر آنی یکجائی ءَ جوڑ کنگ ءِ ھوالگ ءَ معاہدہ مئے اسٹریٹجک فریم ورک ءِ بھر انت۔ بنجاھی وزیر ءِ اھوالکاری ءَ گوشت کہ پاکستان ءُ ترکی ءَ بے دروریں ٹیلنٹ است انت۔ پاکستانی ورنا ارشد ندیم ءِ حوالہ ءَ آئی ءَ سمر اولمپکس ءَ 92.97میٹر ءِ نیزہ ءِ شنگ کنگ ءِ ریکارڈ جوڑ کتگ، بنجاھی وزیر ءَ گوشت کہ ارشد ندیم ءِ سک باز دلبڈی ءِ کسہ اِنت۔ ما چوشیں ورناہانی سرا مسلی تامُر جوڑ کت کنیں۔ پاکستان ءَ شندور پولو فیسٹیول ءِ بابت ءَ گپ ءُ تران کنان ءَ بنجاھی وزیر ءَ گوشت کہ شندور پولو فیسٹیول ایوک ءَ سیل ءُ سواد ءُ دود ءُ ربیدگ ءِ واستہ نہ انت بلکینگ ءَ لیب ءُ گوازی ءِ دیمروئی ءِ واستہ انت۔ آئی ءَ گوشت کہ شندور پولو فیسٹیول پولو میچ انت کہ دگنیا ءِ برز تریں جاہ ءَ لیب کنگ بیت۔ پی ٹی وی ورلڈ ءِ ھمراھی ءَ اے مسلی تامُر ءَ شندور پولو فیسٹیول ءَ سرجمیں دگنیا ءَ پیش دارگ بیت کنت۔ بنجاھی وزیر ءِ اھوالکاری ءَ ٹی آر ٹی ورلڈ ءُ پاکستان ٹیلی ویژن ءِ یکجائی شنگکاری ءِ ھم تجویز داتگ۔ آئی ءَ گوشت کہ پاکستان ءُ ترکی ءِ نیام ءَ یکجائی دود ءُ ربیدگ ءُ مذھبی ارزشت است انت، ایشی ءِ سبب انت کہ پاکستان ءَ ترکی ءِ کسمانکءُ مسلی تامُر سک باز نامدار انت۔ گند ءُ نند ءَ بھارت ءِ ناجائزیں حکومت ءِ چیر دستی ءَ جموں ءُ کشمیر ءِ جیڈھ ءَ را اجاگر کنگ ءِ ھوالگ ءَ وزیر ءِ اھوالکاری ءَ کشمیر ءَ بوھوکیں ظلم ءُ زوراکی آنی ھوالگ ءَ ڈیجیٹل مسلی تامُر جوڑ کنگ ءِ ضلورت ءِ سر ءَ ھم زور پر دات۔ بنجاھی وزیر اھوالکاری عطا اللہ تارڑ ءَ ٹی آر ٹی ورلڈ ءِ جتا جتائیں شوبگ آنی تر ءُ تاب ھم کتگ۔
