اسلام آباد۔ 12 دسمبر (اے پی پی) وزیراعظم محمد شہباز شریف یونیورسل ہیلتھ کوریج کن جہانی گام گیج آتا ستاءِ کرسا پاکستان نا کنڈآن دا گام گیج آتا پبی تفنگ نا عزم انا درشانی ءِ کرینے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ یونیورسل ہیلتھ کوریج ڈے 2024آ تینا کلہو اٹی وزیراعظم پارے کہ نن شاری اسے ناراجی و اقتصادی حیثیت آن قطع نظر، غٹ اکن جان جوڑی نا چیٹ ءِ قابل رسینگ کننگ ءِ اخلاقی وڑاٹ فرض تکنہ۔ اوپارے کہ جان جوڑی آ سمجھوتہ ننا قومی سلامتی ، شونہالی و شونداری آ سمجھوتہ اس مریک، دااسہ ہندن ءُ بشخ اسے ہراڑآن انحراف کننگ مفک ۔ وزیراعظم پارے کہ برجاسال یونیورسل ہیلتھ کوریج ڈے اناتھیم ’’جان جوڑی: حکومت نا زمواری ‘‘ءِ، داہیت ءِ پک کننگ کہ بندغ اسے تینا جان جوڑی نا چیٹ و بنداوی گرج دُن کہ خور، ہنکین یا تعلیم آن اسٹ اسے گچین کروئی تمپ، حکومت نا زمواری ءِ۔ وزیراعظم پارے کہ داہدف نادوئی کننگ کن ننا حکومت جان جوڑی آسودہی پروگرام کون آ گام گیج درستی راستی کرفینے، ہرانا کماشی ءِ وزارت قومی جان جوڑی’’جان جوڑی غٹ اکن ‘‘ نا سرحال آن کننگ ءِ۔ داپروگرام ہرادے جہانی کہول آ ڈبلیو ایچ او کون آ تنظیم تا کنڈآن پذیرائی ملنگ اٹی ءِ، راج انا غٹ آن زیات نزور تپہ غاتے اولیت ترسا لکھ آ خاہوت آتے مفت جان جوڑی نا آسراتی فراوان کیک۔ وزیراعظم پارے کہ حکومت جان جوڑی نا چیٹ انا بنداوی ڈھانچہ ٹی زرکاری کننگ ءِ و دیہی و مر مر انگا علاقہ غاتیٹی خاص وڑاٹ بھاز المی و زند ءِ بچفوک آ دوائی اسکان رسینگ ءِ پک کننگ ءِ۔ وزیراعظم پارے کہ پاکستان 2030اسکان پائیدار شونداری نا ہدف آتیٹی وضع کروک جان جوڑی نا بابت ہدف آتا دوئی کننگ کن سنبرینگوک ءِ۔ نن اقوام متحدہ و ایلو جہانی ادارہ غاتون ہندن ءُ فریم ورک اس تیار و سوگو کننگ کن کمکاری ءِ برجاتخنہ ہرا جان جوڑی ءِ بطور بنداوی انسانی حق آ اولیت ایتک۔
