اسلام آباد۔ 12 دسمبر (اے پی پی) ڈپٹی اسپیکر قومی اسمبلی غلام مصطفیٰ شاہ ایوان اٹی وزیر وپارلیمانی سیکرٹری تا ساڑی مفننگ آ وزیراعظم شہباز شریف ءِ چٹھی اس نوشتہ کننگ نا فیصلہ کرسا پارینے کہ بروک آ ہفتہ وزیرو پارلیمانی سیکرٹری ایوان اٹی ساڑی متورتو ایوان نا کارروائی ءِ چلیفنگ پننگک۔ ڈپٹی اسپیکر ایوا ن نا کارروائی ءِ (اینو) جمعہ اسکان پدبٹے۔ پنچ شنبے نادے آ قومی اسمبلی نا دیوان ڈپٹی اسپیکرقومی اسمبلی مصطفیٰ شاہ نا کماشی ٹی پارلیمنٹ ہاؤس اٹی اڈ ہلک۔ تلاوت کلام پا ک حدیث و قومی ترانہ غان پد ڈپٹی اسپیکر وقفہ سوج آتا بناءِ کرے۔ اعتراضی ٹک آ ہیت کرسا اسد قیصر پارے کہ دروآنبار اینو ہم وزیر و پارلیمانی سیکرٹریک ساڑی افس تو باسک آتا سوج آتا ورندی ءِ دیر اس ایتک ہراڑآ اسپیکر قومی اسمبلی دیوان ءِ 15 منٹ اکن پدبٹے۔وقفہ غان پد دیوان دُوارہ بناکرے تو وقفہ سوج آتا دوارہ بناءِ کننگا۔ پاکستان پیپلز پارٹی نا ایم این اے سید نوید قمر دُوارہ ہنداباندات ءِ ہرفے کہ بنجائی وزیر و سیکرٹری تا ساڑی مفننگ اٹی وقفہ سوج اتے ہمہ چلیفنگ مریک۔اعتراضی ٹک آ ہیت کرسا اپوزیشن لیڈر عمر ایوب پارےکہ تدوک آاِرادے آن وزیر وپارلیمانی سیکرٹری تا ساڑی مفننگ نا پیدواری ءِ کننگ انگ ءِ۔ ڈپٹی اسپیکر ریمارکس تس کہ دا حالیت آتا بابت وزیراعظمءِ چٹھی اس نوشتہ کننگ اُن۔ اوایجنڈاءِ پدبٹسا ایوان نا کارروائی ءِ پگہ(جمعہ ) اسکان پدبٹے۔
