اسلام آباد نا چندی سیکٹر آتیٹی پارکنگ پلازہ غاتا تفنگ اٹ تاخیر خذمت آتا گدریفنگ نا سوب آن مننگ ءِ، وزارت داخلہ

اسلام آباد۔ 12 دسمبر (اے پی پی) قومی اسمبلی ءِ پاننگانے کہ بلیو ایریا تون اوار اسلام آباد نا چندی سیکٹرآتیٹی پارکنگ پلازہ غاتا تفنگ اٹی سیوریج ، ڈرینج ، لائن تا شفٹنگ و گیس و بجلی تو ن اوار ایلو خذمت آتا گدریفنگ نا سوب آن تاخیر مننگ ءِ۔ پنچ شنبے نادے آ قومی اسمبلی نا دیوان اٹی انجم عقیل خان نا سوج آ وزارت داخلہ نا کنڈآن ایوان ءِ نوشتہی وڑاٹ معلومدار کننگانے کہ بلیو ایریاپارکنگ پلازہ نا ڈٹ آتیا کاریم نا بناء مارچ 2022اٹی مسوسس ولے فاؤنڈیشن ڈیزین اٹی بدلی، سیوریج، ڈرینج لین، گیس وبجلی لین تا شفٹنگ نا سوب آن دا ڈٹ داسکان تاخیر نا گواچی ءِ ۔ داکان بیدس منفی موسمی حالیت و دوکان تا ودفنگ نا سوب آن آئی ایٹ، ایف ایٹ و جی نائن مرکز اٹی مجوزہ پارکنگ پلازہ غاتیا داسکان کاریم بناکتنے۔ ایوان ءِ پاننگاکہ امپورٹڈ گڑاء دُن کہ ایلیو یٹرز، فائرفائٹنگ سسٹم جنریٹر و سی سی ٹی وی کون ءِ ایل سی ملنگ نا ویل آتا سوب آن ہم تاخیر مننگ ءِ۔ ایوان آ پیدوار ہناکہ اسلام آباد نا چندی سیکٹرآتیٹی بقایا6 پارکنگ پلازہ غاتیاکاریم ءِ سی ڈی اے نا حالیت ءِ مون آ تخسا کننگک۔