اسلام آباد۔ 12 دسمبر (اے پی پی) قومی اسمبلی نا ڈپٹی اسپیکر غلام مصطفیٰ شاہ بنجائی وزیر و پارلیمانی سیکرٹری تا ساڑی مفننگ آ ایوان نا کارروائی ءِ 15 منٹ اکن پدبٹے۔ پنچ شنبے نادے آ قومی اسمبلی نا دیوان ڈپٹی اسپیکر قومی اسمبلی غلام مصطفیٰ شاہ نا کماشی ٹی پارلیمنٹ ہاؤس اٹی اڈ ہلک۔ تلاوت کلام پاک حدیث و قومی ترانہ غان پد وفاسوج آتا بنامس تو اعتراضی ٹک آ ہیت کرسا اسد قیصر پارے کہ دروآنبار اینو ہم ایوان اٹی نئے تو وزیر اس ارے و نئے بنجائی پارلیمانی سیکرٹری اس ساڑی ءِ تو داوڑاٹ سوج آتا ورندیءِ دِیر اس ایتک، کنا سلاہ ءِ کہ ایوان دانا کارروائی ءِ زرس وخت اکن موخر کننگے تانکہ وزیر و پارلیمانی سیکرٹریک بریر تو دُوارہ ایوان نا کارروائی نا بناءِ کننگے۔ ڈپٹی اسپیکر قومی اسمبلی سید غلام مصطفیٰ شاہ پارے کہ دروہم وزیر آتا ساڑی مفننگ آ چیئردافیصلہ ءِ کریسس کہ وزیراعظم ءِ چٹھی اس نوشتہ کننگک کہ وقفہ سوج و ایوان نا کارروائی ٹی وزیر آتاحاضری ءِ پک کننگے۔ اوکان پد ڈپٹی اسپیکر قومی اسمبلی ایوان نا کارروائی ءِ 15 منٹ اکن معطل کرسا پارت کرے کہ وزیر و بنجائی پارلیمانی سیکرٹری تا حاضری ءِ پک کننگے۔ یات سلے کہ قومی اسمبلی نا بزنس ایڈوائزری کمیٹی ٹی کروک آ فیصلہ نا رداٹ پنچ شنبے نادے آ قومی اسمبلی نا دیوان تینا تخوک آ وخت آ بناکریسس۔
