صدر آصف علی زرداری تون چینی ڈل انا اوڑدہی، کشت وکشار، لائیو اسٹاک، توانائی، ٹرانسپورٹ و مینو فیکچرنگ تون اوار چندی بشخ آتیٹی زرکاری ٹی است خواہی نا درشان

اسلام آباد۔ 12 دسمبر (اے پی پی) صدر مملکت آصف علی زرداری پاکستان و چین نا نیام اٹ اقتصادی و واپاری کمکاری ءِ مون  آدننگ نا گرج آ زور شاغساپارینے کہ ہڑتوم آملک آتا الس خاص کر زرکارو کاروباری ادارہ غاتا نیام اٹ رابطہ غاتے ودفوئی مریک۔ پنچ شنبے نادے آ ایوان ءِ صدر نا پریس ونگ آن جاری بیان نا رداٹ داخیال آتا درشانی ءِ او بلاول ہاؤس کراچی ٹی چین نا کاروباری ڈل اتون اوڑدہی ٹی گپ وتران کرساکرے۔ اوڑدہی ٹی وزیراعلیٰ سندھ سید مراد علی شاہ، صوبائی وزیر و چین نا قونصل جنرل بشخ ہلکر۔ صدر مملکت پاکستانی زرگزران نا چندی بشخ آتیٹی چینی زرکاری ءِ ودفنگ آ زور شاغا۔ ڈل ملکی جان جوڑی نا بشخ انا شونداری کن پاکستان اٹ میڈیکل سٹی نا جوڑ کننگ کن اسہ ارب ڈالر نا زرکاری ٹی است خواہی نا درشانی ءِ کرے۔ ڈل زرگزران نا چندی بشخ خاص کر کشت وکشار، لائیو اسٹاک ، توانائی ، ٹرانسپورٹ و مینو فیکچرنگ اٹی زرکاری ٹی است خواہی نا ہم درشانی ءِ کرے۔ صدر مملکت پارے کہ پاکستان  وچین نا نیام اٹ گہرا و تاریخی برادرانہ تعلقداری ءِ، پاکستان و چین اہم امور آ اسیجائی فائدہ و خیالات ءُ۔ صدر آصف علی زرداری پارے کہ پاکستان و چین نا نیام اٹ کیہی دہائی تیا تالان گہری سنگتی ءِ، گوادر رپورٹ ءِ اسہ علاقائی واپاری و اقتصادی ہند انا وڑاٹ شون تننگ کنا وژن ئس۔ اوپارےکہ گوادر بندرگاہ غان نئے بیرہ علاقائی رابطہ غاک گچین مریرہ بلکن علاقائی واپار و اقتصادی کمکاری ءِ ہم مو ن آ دننگک۔ پاکستان چینی زرکارآتے بخیراٹ پاہک۔ صدر مملکت پارے کہ پاکستان چین اتون اقتصادی تعلقداری و کاروبار ءِ اولیت ایتک، پاکستان چینی زرکارآتے ہرممکن آسراتی و کمک فراوان کننگ کن سنبرینگوک ءِ۔ صدر پارے کہ سندھ اٹی چینی زبان نا کورس درستی راستی کرفنگانے، چینی زبان نا کورس آک پاکستان و چین نا نیام اٹ السی و دودوربیدہ ئی رابطہ غاتے سوگو کننگ نا کنڈآ اسہ ہم ءُ گام اس جوڑمریرہ۔