اسلام آباد۔ 11 دسمبر (اے پی پی) بنجائی پارلیمانی سیکرٹری ڈٹ بندی، شونداری ، اصلاحات و خصوصی گام گیج وجیہہ قمر قومی اسمبلی ءِ باوری کرفے کہ کینسر نا ناجوڑ آتیکن دوائی تا فراوانی نا ڈٹ ءِ بروک آ سال انا شونداری بجٹ (پی ایس ڈی پی) ٹی اوار کننگک۔ اووضاحت کرے کہ تعلقدار وزارت ڈٹ ءِ وخت آ جمع کرفتو ہرانا سوب آن دا برجاسال انا بجٹ اٹی اوار مننگ کتو۔ اوپارے کہ دا اسہ اہم ءُ ویل اسے و داڑآ سرجمی اٹ کاریم کننگ انگ ءِ تانکہ زوت مثبت نتیجہ مون آ برے۔ نوشتہی ورندی ٹی پاننگاکہ ڈٹ بندی نا وزارت پوسکن آ ڈٹ بیرہ تکنیکی منظوری آن پد شونداری بجٹ اٹی اوار کیک۔ کینسر دوائی تا ڈٹ انا فائل 30 جولائی 2024آ جمع کرفنگا، ہرابجٹ ءِ گڈیکو دروشم اس تننگ آن پد انا تاریخ ئس۔ دا ڈٹ ءِ 18 ستمبر 2024آ جا ن جوڑی نا بشخ اٹی تکنیکی جاچ اکن پیش کننگا و داسہ منظوری نا ریسہ غاتیٹی ءِ۔ دا ڈٹ شونداری سرجزآتا بشخ اف بلکن دوائی تا ہلنگ کن ءِ، ہراٹی 789.35ملین روپئی نا حکومتی بشخ اوار مریک۔ فنڈ آتا دستیابی کن سپانسر آتا کمک ءِ ہم ہلنگ مریک۔ منظوری آن پد دا ڈٹ مالی سال 2025-26نا بجٹ اٹی اوار کننگ مریک۔
