واشنگٹن۔ 11 دسمبر (اے پی پی) امریکہ ٹی پاکستان نا سفیر رضوان سعید شیخ سے شنبے نادے آ کیپیٹل ہل اٹی پین چار امریکی کانگریس نا باسک آتون جتا جتا اوڑدہی کرے۔ دا اوڑدہی تیٹی ہڑتوم آ ملک آتا نیام اٹ زرکاری و واپاری ءِ مون آ دننگ نا گمان تیا گپ وتران کننگا۔ واشنگٹن اٹی پاکستانی سفارت خانہ نا کنڈآن جاری بیان نا رداٹ امریکی کانگریس نا ریپبلکن رکن رچ میک کارمک تون اوڑدہی ٹی پاکستانی سفیر پاک امریکہ ہڑتوم آ کنڈآتا تعلقداری تے پین سوگو کننگ آ گپ وتران کرے۔ داوخت آ اقتصادی تعامل و سیکورٹی کمکاری نا کسر تے ودفنگ آ چکار کننگا۔ اوعلاقائی وجہانی اہمیت نا امور تیا ہم گپ وتران کرے۔ کانگریس نا ڈیموکریٹ باسک جیسمین کروکٹ تون اوڑدہی ٹی سفیر رضوان سعید شیخ ہڑتوم آکنڈآتا تعلقداری و پاکستان وامریکہ نا نیام اٹ السی کہول آ رابطہ غاتا وڑوڈول آتیا گپ وتران کرے۔ پاکستانی سفیر 2025 اٹی ٹیکساس نا اسہ واپاری ڈل اسے پاکستان آ بننگ نا سلہ خلک ہرادے جیسمین کروکٹ اصولی وڑاٹ اودے امنا کرے۔ سفیر رضوان سعید شیخ و کانگریس نا ریپبلکن باسک ارل بڈی کارٹر نا نیام اٹ اوڑدہی ٹی ہڑتوم آ کنڈآتا تعلقداری آ گپ وتران آن بیدس اقتصادی پڑاٹ ریاست جارجیا تون کمکاری نا گمان تا جاچ ءِ ہلنگا۔ پاکستانی سفیر ریپبلکن باسک کانگریس نیل ڈن تون ہم اوڑدہی کرے، ہراٹی ہڑتوم آ ملک آتا نیام اٹ ہڑتوم آ کنڈآتا تعلقداری آ گپ وتران کریر۔ اوڑدہی ٹی فلوریڈا تون واپار، زرکاری، آئی ٹی و کشت وکشار آ کمکاری ءِ ودفنگ آہم گپ وتران کننگا۔
