اسلام آباد۔ 11 دسمبر (اے پی پی) بنجائی وزیر توانائی (پاور ڈویژن ) سردار اویس احمد خان لغاری پارینے کہ پاکستان تاجکستان تون تینا ساڑی آ دوستانہ تعلقداری تے ودفنگ نا خواہندار ءِ ، ہڑتوم آ ملک آتا نیام اٹ واپار نا گیشتر وارخواہی ساڑی ءِ، نن تین پہ تینی واپار اٹی بروک غٹ دشواری تے مرکننگ خوانہ، پاکستان تاجکستان اسیجائی کمیشن ہڑتوم آ کنڈآتا تعلقداری تے سوگو کننگ و تین پہ تینی است خواہی نا اہم ویل آتے ایسر کننگ اٹ اہمیت تخک۔ چارشنبے نادے آ پاکستان و تاجکستان نا نیام اٹ 7 می اسیجائی کمیشن دیوان آن تران کرسا اوپارےکہ اقتصادی کمکاری نا مو ن آ دننگ و صنعت، واپار، کشت وکشار، توانائی و اسیجائی ڈٹ آتیٹی کمکاری ءِ ودفنگ نا گرج ءِ و نن شش میکو اسیجائی کمیشن نا فیصلہ غاتیا عملدرآمد ءِ پک کننگ خوانہ۔ پاکستان و تاجکستان نا نیام اٹ 7 می اسیجائی کمیشن دیوان نا مہمانداری وزارت اقتصادی امور کرے۔ پاکستان نا کنڈآن وزیر توانائی سردار اویس احمد خان لغاری وخت اس کہ تاجکستا ن نا کنڈآن وزیر توانائی و آبی وسیلہ دیلرشوفا کر دیوان نا کماشی ءِ کرے۔ بنجائی وزیر توانائی اویس لغاری پارےکہ پاکستان و تاجکستان نا نیام اٹ گہرا دوستانہ تعلقداری ءِ، پاکستان ترکیہ غان پد ارٹ میکو ملک ئس ہرا ستمبر 1991ٹی تاجکستان نا آجوئی ءِ امنا کرے۔ اوپارے کہ ننا علاقائی قربت تون اوار اوار ہڑتوم آ ملک آتیٹی مذہب ، تاریخ و دودوربیدہ اسٹ ءِ، ہڑتوم آ ملک آتا مفاد اٹی واپاری و اقتصادی بشخ آتیٹی کمکاری نا پوسکن ءُ کسر پٹنگ مریک۔ اویس لغاری پارے کہ تاجکستان ءِ وسط ایشیاٹی اہم ءُ ہند اس دوئی ءِ و دا نیامی ایشیا نا گیٹ وے ءِ، ہڑتوم آ ملک آتا نیام اٹ ہڑتوم آکنڈآتا واپار ءِ ودفنگ نا گیشتر گمان ساڑی ءِ۔ بنجائی وزیرپارے کہ واپاری کچ ءِ ودفنگ کن پلان آف ایکشن اس تیار کننگ نا گرج ءِ و دا چرجوئی ٹی ہڑتوم آملک آتا نیام اٹ واپار و واپار آ اسیجائی ورکنگ گروپ اہم کڑد ادا کننگ کیک۔
