اسلام آباد۔ 10 دسمبر (اے پی پی) سول جج جوڈیشل مجسٹریٹ اسلام آباد احمد شہزاد گوندل قومی خبررساں ادارہ (اے پی پی ) ٹی جعلی بھرتی تا مقدمہ ٹی پندار مرکزی دوبہ دار ارشد مجید چوہدری تون اوار 5 دوبہ دار آتے 2 دے ئی جونی ریمانڈ آ ایف آئی اے نا دُوٹی تس۔ سے شنبے نادے آ قومی جاست وپاستی ادارہ (ایف آئی اے ) اے پی پی نا مسکوہی منیجر اکاؤنٹس ارشد مجید ، اونا مار تیمور ارشد، سعد یوسف ، قیصر جواد و فواد خان ءِ عدالت اٹی پیش کرے۔ پرچہ ریمانڈ اٹی ایف آئی اے خواست کرے کہ دوبہ دار آتیان مستی جاست وپاست، ریکارڈ و زر انا برآمدگی کن 7 دے ئی جونی ریمانڈ درکار ءِ۔ ایف آئی اے نا سب انسپکٹر احتشام گوندل عدالت ءِ پارے کہ مسکوہی منیجر اکاؤنٹس ارشد مجید 18 ملازم آتے تنخواہ جاری کننگ نا دستخط کرے ہراکہ غیرکانودی گام اسے، وخت اس کہ عثمان یونس بطور آڈٹ انچارج دا فراڈ و دروٹی اوار ءِ۔ دوبہ دار آتیان دستاویز آتا برآمدگی و اے پی پی آن ہلوک آ تنخواہ نا مد اٹی وصول کروک آ زر دوئی کننگ کن دوبہ دار آتا 7 دے انا جونی ریمانڈ تننگے۔ جاست و پاستی آفیسر احتشام گوندل پارے کہ ننا جاست وپاست نا رداٹ دا تعیناتی تا نئے تو ادارہ نوٹیفکیشن کرینے ، نئے ایچ آر ڈیپارٹمنٹ اٹی اوفتا ریکارڈ ارے و نئے ہی میڈیکل رپورٹ ادارہ ءِ پیش کننگانے۔ دابھرتی تے ادارہ نا سروک نا جعلی دستخط آتا کمک اٹ کننگانے۔ جاست وپاستی آفیسر عدالت ءِ پارے کہ قومی خبررساں ادارہ اے پی پی نا منیجنگ ڈائریکٹر و منیجر ایچ آر آن ہم جاست وپاست کرینے ہراڑآن پک مسنے کہ دا تعیناتیک اونا منظوری اٹ متنو۔ عدالت ءِ پاننگاکہ اوفتیان گیشتر ملازم آک مسہ مسہ تُو انا تنخواہ ہلکنو۔ اوفتا ریکوری و دا تعیناتی تا جعلی دستاویز آتا برآمدگی کن دوبہ دار آتا جونی ریمانڈ المی ءِ۔ مسکوہی منیجر اکاؤنٹس ارشد مجید چوہدری نا مار تیمور ارشد ہم فائدہ ہلوک آتیٹی اوار ءِ۔ دامقدمہ نا بابت غٹ ریکارڈ ارشد مجید تون ءِ، اونا ہم جونی ریمانڈ المی ءِ، داکیس اٹی پندار دوبہ دار آتیان گیشتر رشتہ دار ءُ، وخت اس کہ داہم پک مریک کہ دامقدمہ نا مرکزی کڑد مسکوہی منیجر اکاؤنٹس ارشد مجید چوہدری ءِ۔ اے پی پی نا لیگل ایڈوائزر خرم بیگ عدالت ءِ پارے کہ دوبہ دار آک جعلی کاغد تیار کرسا جعلی دستخط آتا کمک اٹ تعیناتی کریر و مسکوہی منیجر اکاؤنٹس ارشد مجید اوفتے تنخواہ جاری کرے۔ خرم ملک پارے کہ داتعیناتی تا منظوری تقرری کروک آ کمامدارآتیان ہلنگاسس نئے ایچ آرنا ریکارڈ اٹی ساڑی ءِ۔ دزگیر 5 دوبہ دار آتیان 4 دوبہ دار ہندن ءُ ہرافک اے پی پی آن تنخواہ نا کمک اٹ غیرکانودی فائدہ دوئی کریر وخت ا س کہ مسکوہی منیجر اکاؤنٹس نا دستخط ساڑی ءِ، ہرانا کمک اٹ اوفتے تنخواہ جاری کرسا کننگا۔ سماعت اٹی فاضل جج احمد شہزاد گوندل ایف آئی اے آن اَرفے کہ انت دا کیس اٹی تقرری کروک آ کمامدارآتیان ہم جاست وپاست کننگا تو اونا ورندی ٹی انسپکٹر ایف آئی اے عدالت ءِ پارے کہ ایم ڈی اے پی پی تون اوار منیجر ایچ آرتون ہم دا باندات آ انویسٹی گیشن کننگا ہراڑآن داپک مسنے کہ ہندا بھرتی تے جعلی و غیرکانودی دستاویز تیار کرسا کننگانے۔ فاضل جج پارے کہ غیرکانودی بھرتی مروک آ زر ءِ ریکور کروئی مریک، پین انویسٹی گیشن آن پک مریک کہ انت دا بھرتیک جعلی ءُ۔ فاضل جج پرمان کرے کہ دوبہ دار آتا برخلاف کروک آ محکمانہ انکوائری نا رپورٹ ءِ ہم عدالت اٹ پیش کننگے۔ سماعت اٹی ارشد مجید و تیمور ارشد نا کنڈآن عامر عباس ملک، دوبہ دار سعد یوسف نا کنڈآن راشد عمراولکھ عدالت اٹ پیش مسر و جونی ریمانڈ نا مخالفت ءِ کریر۔ عدالت فریق آتا دلیل آتا پورو مننگ آ پنچ انگا دوبہ دارآتے 2 دےئی جونی ریمانڈ آ عبوری ضمانت آتا مسترد مننگ آ کمرہ عدالت نا پیشن آن دوبہ دار آتے دزگیرکریسس۔ ایف آئی اے قومی خبررساں ادارہ اے پی پی ٹی جعلی بھرتی تا کیس اٹی دوبہ دار آتیا ایف آئی آر نوشتہ کرسا جاست وپاست نا بناءِ کریسس۔
