بنجائی وزیر داخلہ محسن نقوی تون امریکہ نا قائم مقام سفیر نیٹلی بیکر نا اوڑدہی، ہڑتوم آ کنڈآتا تعلقداری و کمکاری ءِ ودفنگ آ گپ وتران

اسلام آباد۔ 10 دسمبر (اے پی پی) بنجائی وزیر داخلہ محسن نقوی تون امریکہ نا قائم مقام سفیر نیٹلی بیکر اوڑدہی کرے ہراٹی پاک امریکہ تعلقداری تون اوار ہڑتوم آ کنڈآتا کمکاری ءِ ودفنگ تون اوار ایلو امور تیا گپ وتران کننگا۔ کنٹری ڈائریکٹر آئی این ایل لائن نیلسن ہم داوخت آ ساڑی ئسک۔ قائم مقام امریکی سفیر نیٹلی بیکر تدوک آ دے اسلام آباد اٹی پولیس و رینجرز کارندہ غاتا شہیدی آ ہڑزخواہی کرے۔ اوڑدہی ٹی پاک امریکہ تعلقداری تون اوار ہڑتوم آکنڈآتا کمکاری ءِ ودفنگ آگپ وتران کننگا۔ اوڑدہی ٹی پاکستان اٹی آئی سی سی چیمپیئنز ٹرافی ٹورنامنٹ نا اڈتننگ آہم گپ وتران کننگا و نیٹلی بیکر چیمپیئنز ٹرافی نا پاکستان اٹی اڈتننگ نا بابت نیک است خواہی نا درشانی ءِ کرے۔ وزیرداخلہ محسن نقوی قائم مقام امریکی سفیر تون گپ وتران کرسا پارے کہ ایف آئی اے ءِ ایف بی آئی نا طرز آ پوسکن آ ادارہ جوڑ کننگ خوانہ و دا رداٹ امریکہ نا کمکاری نا ستاءِ کینہ۔ اوڑدہی ٹی داہیت آ امنا کننگاکہ امریکہ ایف آئی اے ءِ ایف بی آئی نا طرز آ پوسکن آ وڑوڈول آتون ہم گرنچ کننگ اٹ کمک فراوان کیک وخت اس کہ امریکہ نیشنل فرانزک ایجنسی ءِ پوسکن آ خواست آتا رداٹ فعال کننگ اٹی ہم کمک فراوان کیک۔ بنجائی وزیر داخلہ محسن نقوی پارے کہ کانود نافذ کروک آ ادارہ غاتا کاریم نا کچ ءِ ودفنگ اٹ امریکی کمکاری بھاز اہمیت تخک۔ دہشت گردی و ہلہلہ ئی حالیت آتون مون تننگ کن سول آرمڈ فورس آتے پوسکن ازباب و سازوسامان نا فراوانی وخت انا اہم ءُ گرج اسے، سول آرمڈ فورس آتے پوسکن آ ازباب و سازوسامان آن شپ کننگ اولیت ءِ۔ اوپارے کہ پاکستان و امریکہ نا نیام اٹ گچین تعلقداری ءِ، ہرا کیہی دہائی تیا تالان ءِ۔ اوپارے کہ کانودی دستاویز آتا حامل درملکی اسے اسلام آباد آن کشنگ پننگ انگ ءِ ولے غیرکانودی وڑاٹ رہینگوک درملکی تے اسلام آباد اٹی رہینگ انگ نا موکل تفننگک۔ قائم مقام امریکی سفیر نیٹلی بیکر پارے کہ کانود نافذ کروک آ ادارہ غاتیٹی زالبول آتا نمائندگی ءِ ودفنگ آ پاکستانی کمامدارآتون اواری اٹ کاریم کننگ اُن۔ اووزیرداخلہ محسن نقوی ءِ پولیس آفیسر آتا پاسنگ آؤٹ پریڈ نا پروقار دود انا اڈتننگ آ مبارکبادی تس۔ بنجائی سیکرٹری داخلہ خرم علی آغا و ایڈیشنل سیکرٹری داخلہ رفعت مختار راجہ ئسک ہم داوخت آ ساڑی ئسر۔