اسلام آباد۔ 10 دسمبر (اے پی پی) بنجائی وزیر امور کشمیر ، گلگت بلتستان و سیفران انجینئر امیر مقام انسانی حق انا جہانی دے آ تینا کلہو اٹی پارے کہ مچ آدنیا ٹی اینو انسانی حق انا جہانی دے ءِ اڈتننگ انگ ءِ، دادے اقوام عالم ءِ یات ترفک کہ او انسانی حق انا رکھ انا پاسداری ءِ کیر، انسانی حق انا جہانی دے آ نن بھارت نا غیرکانودی کوزہ ٹی جموں وکشمیر ٹی تینا ایلم و ایڑھ تے بایدے است آن دپن۔ اوپارے کہ بھارت نا غیرکانودی کوزہ ٹی جموں وکشمیر اٹی انسانی حق انا سنگین خلاف ورزی تیا ہم اقوام متحدہ تون اوار جہانی برادری نا دمدستی چکار نا گرج ءِ، کشمیری زالبول آتے بے شرفی بھارتی فوج اکن ہڑدے نا عمل ءِ، وادی ٹی تدوک آ کیہی سال آتیان انسانیت نا تذلیل مننگ ءِ، بھارت جموں وکشمیر اٹی ظلم و ستم ءِ برجاتخانے، بھارتی فوج داتم اسکان لکھ آ کشمیری تے شہید کرینے، ہزار آ زالبول آک داسہ ہم جنوزان مسنو، ہزارآتا کچ اٹی کشمیری چناک چوری مسنو۔ انجینئر امیر مقام پارے کہ دنیا ءِ سمجھوئی مریک کہ کشمیر نا ویل انا ایسری آن بیدس دنیا ٹی امن مننگ کپک، بھارت تینا غیرکانودی کوزہ ٹی جموں وکشمیر اٹی آبادی نا کچ ءِ بدل کننگ ءِ۔ اوپارے کہ پاکستان کشمیری تا روا حق خودارادیت نا دوئی کننگ کن اوفتا اخلاقی ، سیاسی و سفارتی مخ تفی ءِ برجاتخنگ نا ہم قول کیک۔ نئے بیرہ اینو بلکن ہردے حکومت پاکستان غٹ اکن انصاف، بریبری ، وقار و انسانی حق اکن کاریم کرسا کیک۔
