اسلام آباد۔ 10 دسمبر (اے پی پی) وزیراعظم محمد شہباز شریف پارینے کہ سول نافرمانی نا کال آن بھلا دشمنی پاکستان تون پین انتس مننگ کیک، زرراہی تس اٹی ریکارڈ ودکی پیشن نا ملک پاکستانی تا پت انا درشانی ءِ، زرگزرانی سوگوی کن سیاسی سوگوی المی ءِ، اسلام آبادآجلہو کروک آ شرپسند آتے ہلنگ پننگک، شام اٹی اختہ پاکستانی تا کشنگ کن میکنزم اس طے مس۔ سے شنبے نادے آ بنجائی کابینہ نا دیوان آن تران کرسا وزیراعظم محمد شہباز شریف پارےکہ تدوک آ دے انا تہہ ٹی شام انا حالیت آک یکسر بدل مسر۔ پاکستان دا حالیت آتیٹی بے کنڈ ہلوک ئس۔ شام اٹی داوخت آ 250 زائر و 300 پین پاکستانی ساڑی ءُ۔ داکان بیدس کیہی پاکستانی خاہوت سال آتیان ہموڑے آباد ءُ۔ شام اٹی اختہ پاکستانی تا کشنگ نا بابت نائب وزیراعظم و شام اٹی پاکستان نا سفیر متحرک کڑد ادا کریر۔ تدوک آ دے کنا شام اٹی تعینات پاکستانی سفیر تون اوڑدہی ہم مس۔ دابندغ آتے بذریعہ سڑک لبنان و رفیق حریری بالی پٹ آن بذریعہ چارٹرڈ فلائٹ پدی اتنگ مریک۔ درو لبنان نا وزیراعظم تون دا چرجوئی ٹی ای ہیت کرینٹ۔ ریاض اٹی سعودی ولی عہد نا سلہ غا ہراتم ای ہناٹ تو کنا لبنان نا وزیراعظم تون اوڑدہی ہم مسوسس۔ اوپاکستانی الس و حکومت کن نیک جوزہ غاتا درشانی ءِ کرے و پاکستان نا کنڈآن مون تروک آ امداد نا منت واری ءِ ہم ہرفیسس۔ لبنان نا وزیراعظم بیروت نا کمک اٹ شام اٹی اختہ پاکستانی نا کشنگ نا چرجوئی ٹی تینا ہرممکن کمکاری نا باوری کرفے۔ اوتعلقدار کمامدارآتے دا چرجوئی ٹی احکامات ہم جاری کرینے۔ ہندا وڑ شام اٹی اختہ پاکستانی تا کشنگ نا چرجوئی ٹی تینا ہرممکن کمکاری نا باوری کرفے۔ اوتعلقدار کمامدارآتے دا چرجوئی ٹی پرمان ہم جاری کرینے۔ ہنداوڑ شام اٹی اختہ پاکستانی تا کشنگ نا میکنزم اس طے مسنے۔ وزیراعظم ہفتہ وار کبینی (ایس پی آئی) نا انڈکس کم مرسا 3.7 درسد آ بننگ آ اللہ تعالیٰ نا منت واری ءِ ہرفسا پارے کہ زرگزرانی سوگوی و شونداری کن سیاسی سوگوی و امن و ایمنی المی ءِ ۔ وزیراعظم کابینہ ءِ پارے کہ درو آذربائیجان نا سفیر تون ہم اوڑدہی مس۔ فروری ٹی وزیراعظم پاکستان آذربائیجان نا دورہ ءِ کیک و پاکستان اٹ آذربائیجان نا 2 ارب ڈالر نا زرکاری نا بابت معاہدہ مریک۔ وزیراعظم پارے کہ حکومت نا کوشست و گام گیج آتیان زرگزرانی حالیت آتیٹی گچینی بننگ ءِ۔ داڑکن سیاسی سوگوی المی ءِ۔ امن وایمنی نا بابت تدوک آ دے ہم دیوان مس ہراٹی ای پارت کریسٹ کہ اسلام آباد آ جلہو نا ناپاک کوشست و پرغ و بٹ کننگ نا ہرا سازش پاکستان نا برخلاف کننگا اوٹی ہراہرا اوار ءُ شاہدی اتون اوفتا برخلاف کارروائی مریک و اوفتے ہچ ءُ حالیت اسے ٹی ہلنگ پننگک و اسہ بے گناہ اسے ہم دُو خلنگ پننگک۔ وزیراعظم زر راہی تس اٹی ریکارڈ ودکی آ است جمی نا درشانی ءِ کرسا پارے کہ دا پیشن نا ملک پاکستانی تا پت انا درشانی ءِ ہرا پیشن ناملک دے و نن خواری کرسا رزق حلال کٹرہ و تینا زر آتے وطن آ مون ایترہ۔ وزیراعظم سول نافرمانی نا کال ءِ بدبختی اس گوندسا پارے کہ داکان بھلا دشمنی پاکستان تون پین انتس مننگ کیک۔ وزیراعظم دااومیت نا درشانی ءِ کرے کہ پاکستان زرگزرانی حالیت آتیٹی گچینی اتون تینا ہند ءِ ضرور دوئی کیک۔
