اسلام آباد۔9دسمبر (اے پی پی):مزن وزیر محمد شہباز شریف ءَ ہدایت کتگ کہ شام ءَ چہ ہمساہگیں ملک آنی وسیلگ ءَ وتی ملک ءَ واتر بوھگ لوٹوکیں پاکستانی آناں زوت چہ زوت یلہ کنگ ءِ واستہ کارروائی منصوبگ جوڑ کنگ بہ بیت۔ شام ءِ استیں جاور ھال آنی رد ءَ دو شمبے ءِ روچ ءَ مزن وزیر محمد شہباز شریف ءِ سروکی ءَ پاکستانی آنی یلہ کنگ ءِ ھوالگ ءَ دیوان برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ شام ءَ چہ ھمساھگیں ملک آنی وسیلگ ءَ وطن ءَ واتر بوھگ لوٹوکیں پاکستانی آناں زوت چہ زوت درکنگ ءِ واستہ یک پلان آف ایکشن ءِ جوڑ کنگ ءِ ہدایت کتگ۔ آئی ءَ پرمان داتگ کہ شام ءَ نندوکیں پاکستانی آنی ایمنیں درکپگ ءِ واستہ گامگیج چست کنگ بہ بیت۔ آئی ءَ گوشت کہ شام ءَ نندوکیں پاکستانی جان ءُ مال ءِ ایمنی مئے اولی ترجی اِنت، ایشی ءِ واستہ توامیں وسیلگ آناں کارمرد کنگ بہ بیت۔ مزن وزیر ءَ دمشق ءَ پاکستانی سفارتخانہ ءَ را ہدایت کتگ کہ آ یک انفارمیشن ڈیسک ءُ پاکستانی آں گوں رابطہ کنگ ءِ ھاتر ءَ ہیلپ لائن جوڑ بہ کنت۔ آئی ءَ پرمان داتگ کہ شام ءُ آئی ءِ ھمساھگیں ملک آنی تہ ءَ درئی کارانی کارگس ءِ کرائسس مینجمنٹ یونٹ ءُ انفارمیشن ڈیسک 24کلاک کار ءَ بہ بنت داں امن ءُ ایمنی ءِ جاور ھال گہتر بہ بنت۔ گند ءُ نند ءَ نائب مزن وزیر محمد اسحاق ڈار، وزیر دفاع خواجہ محمد آصف، وزیر برائے اقتصادی امور احد چیمہ، وزیر اطلاعات و نشریات عطا اللہ تارڑ، معاون خصوصی طارق فاطمی ءُ سیادی داروکیں ادارگ آنی مزنیں افسر آں بھر زوری کت۔
