اسلام آباد۔ 09 دسمبر (اے پی پی) بنجائی وصوبائی کانود ساز ادارہ غاتا نیام اٹ کمکاریءِ سوگو کننگ و کانود سازی نا عمل اٹ مون تروک چیلنج آتا تین پہ تینی افہام و تفہیم نا کمک اٹ ایسر اس پٹنگ کن اسپیکر قومی اسمبلی سردار ایاز صادق قومی اسمبلی سیکرٹریٹ اسپیکر قومی اسمبلی سردار ایاز صادق نا کماشی ٹی 18 می اسپیکرز کانفرنس نا مہمانداری ءِ کیک۔ 18 می اسپیکرز کانفرنس نا اڈتننگ 19و20دسمبر 2024آ پارلیمنٹ ہاؤس اسلام آباد اٹی مریک۔ کانفرنس نا کماشی ءِ اسپیکر قومی اسمبلی سردارایاز صادق کیک، دااِرادے ئی کانفرنس اٹ ہرچار آ صوبائی اسمبلی تا اسپیکر و آزاد جموں کشمیر کانود ساز اسمبلی و گلگت بلتستان اسمبلی نا اسپیکر ز صوبائی و کانود ساز اسمبلی تا باسک آتا ڈل آتون بشخ ہلیک۔ کانفرنس اٹی کانود سازی نا اسیجائی ویژن آ گپ وتران کننگک۔ 18 می اسپیکر ز کانفرنس 2014آن پد دہ سال آن پد اسہ وار ولدا سردار ایاز صادق نا کماشی ٹی اڈ ہلنگ والا ءِ۔ یات سلے کہ 2014ٹی 17 می اسپیکرز کانفرنس ہم اسپیکر قومی اسمبلی سردار ایاز صادق نا کماشی ٹی اڈہلکوسس، اسپیکرز کانفرنس نا اڈتننگ، اسپیکر قومی اسمبلی نا بنجائی و صوبائی کانود سازی ادارہ غاتا نیام اٹ کمکاری و رابطہ غاتے مون آ درسا تین پہ تینی سلابت اٹ کانود سازی نا وڑوڈول ءِ پین گچین و جوان کننگ نا کوشست آتا عکاسی ءِ۔ کانفرنس نا اڈتننگ نا مسخت پارلیمانی ادارہ غاتے ساڑی و آخبت نا چیلنج آتے گچین وڑاٹ مون تننگ کن اسیجائی لائحہ عمل اس وضع کننگ ءِ۔ 18 می اسپیکرز کانفرنس نا تیاری تا چرجوئی ٹی، 11 دسمبر 2024آ سیکرٹری جنرل قومی اسمبلی سید طاہر حسین نا کماشی ٹی پارلیمنٹ ہاؤس اٹی سیکرٹریز کانفرنس اڈتننگک۔ دااہم دیوان اسہ متکن پارلیمانی روایت اسے، ہرا اسپیکر زکانفرنس نا ایجنڈا ءِ گڈیکو دروشم اس تننگ و کانود ساز ادارہ غاتا نیام اٹ ہم آہنگی ءِ پک کننگ کن بست وبند آتا جاچ ءِ ہلنگک۔ 18 می اسپیکرز کانفرنس اٹی کیہی اہم کانود سازی نا سرحال آتیا چکار کننگک ہرافتے ٹی پارلیمانی کارروائی تیٹی نظم و ضبط و کارکڑد ءِ پک کننگ کن انسٹی ٹیوشن آف وپس ءِ سوگو کننگ، چاگڑدی بدلی تون مون تننگ کن آئین اٹ زوت آتے ٹی اوار کروک آرٹیکل9۔اے آ عملدرآمد، کانود سازی نا وڑوڈول اٹی شفافیت ءِ مون آدننگ کن اصلاحات ، رسینگ ءِ گچین کننگ کن اسہ قابل پت ورچوئل پارلیمنٹ اسے نا جوڑ کننگ، پارلیمنٹ و الس نا نیام اٹ سوگو تعلقداری تے مون آ دننگ و کانود سازی نا عمل ءِ آوار کننگ کن قاعدہ و ضابطہ غا نظرثانی اوار ءِ۔ اسپیکرز کانفرنس نا اسہ تاریخی پارلیمانی روایت اسے دانابناء1921اٹی مس ہراتم اولیکو اسپیکر کانفرنس شملہ ٹی سینٹرل لیجسلیٹو اسمبلی نا اسپیکر فریڈرک وائٹ نا کماشی ٹی اڈہلک، اسپیکرز کانفرنس پاکستان اٹ بین المقننہ مکالمہ و کمکاری نا اسہ گچین ءُ پلیٹ فارم اسے۔

متعلقہ مضامینمصنف کی طرف سے مزید