اسلام آباد۔ 09 دسمبر (اے پی پی) وزیراعظم محمد شہباز شریف پارینے کہ اسلام آباد اٹی تدوک آ دے تیٹی ہڑدڑ، پرغ وبٹ، سرکار ی و نجی ملکیت آتے نسخان تروک آتا برخلاف سخت کارروائی کن گام گیج آتے ترند کننگے، داہیت ءِ پک کننگے کہ بے چیٹی تالان کروک آتا برخلاف کارروائی ٹی بے گناہ و کودک شاری اس دزگیر مف۔ دوشنبے نادے آ وزیراعظم آفس نا پریس ونگ آن جاری کروک بیان نا رداٹ وزیراعظم محمد شہباز شریف نا کماشی ٹی امن و ایمنی نا حالیت آتیا بڑزکو کہولی جاچ دیوان اس اڈ ہلک۔ وزیراعظم پارے کہ کس اسے موکل تفنہ کہ او بے چیٹی تالان کرسا ترندی اٹ سوگو مروک آ زرگزران ءِ لتاڑنگ نا سازش کے، اسلام آباد اٹی تدوک آ دے تیٹی ہڑدڑ، پرغ و بٹ ، سرکاری و نجی ملکیت آتے نسخان تروک آتا برخلاف سخت کارروائی کن گام گیج آتے ترند کننگے۔ اوپارے کہ داہیتءِ پک کننگے کہ بے چیٹی تالان کروک آتا برخلاف کارروائی ٹی بے گناہ و کودک شاری اس دزگیرمف۔ وزیراعظم بے چیٹی و پھسات تالان کروک آتا پیدواری نا عمل ءِ گچین کننگ و اوفتا برخلاف پبی شاہدی دوئی کننگ نا پارت کرے۔ اوپھسات تالان کروک آتا برخلاف جوڑ کروک آ ٹاسک فورس ءِ ہرممکن وسیلہ فراوان کننگ، بنجائی پراسیکیوشن سروس ءِ وزارت کانود نا رداٹ اتنگ و اسلام آباد زندان نا تفنگ ءِ زوت آن زوت پورو کننگ و دابابت فنڈ دمدستی جاری کننگ نا ہم پارت کرے۔ دیوان ءِ اسلام آباد اٹی امن و ایمنی نا حالیت آتا بابت گام گیج آتیا حوال تننگا۔ حوال اٹی پاننگاکہ اسلام آباد سیف سٹی نا دنگ ءِ ودفنگ انگ ءِ و سیف سٹی کیمرہ غاتا کچ اٹی ہم ودکی کننگ انگ ءِ، اسلام آباد زندان نا ماڑی تے بروک آ سال مارچ اسکان پورو کننگک۔ دیوان اٹی بنجائی وزیر اقتصادی امور احدخان چیمہ ، بنجائی وزیر داخلہ سید محسن رضانقوی ، بنجائی وزیر کانود و انصاف اعظم نذیر تارڑ ، بنجائی و زیر حوالکاری و شینکاری عطاء اللہ تارڑ، سلاہکار وزیراعظم رانا ثناء اللہ ، وزیر مملکت انفارمیشن ٹیکنالوجی وٹیلی کام شزافاطمہ ، وزیراعظم نا کوآرڈی نیٹر رانا احسان افضل و تعلقدار بڑزکو سرکاری آفیسر آک بشخ ہلکر۔
