راولپنڈی۔ 09 دسمبر(اے پی پی) اے این ایف منشیات اسمگلنگ نا برخلاف تعلیمی ادارہ و ملک انا چندی شارتیٹی برجاکریک ڈاؤن اٹی 11 کارروائی تیٹی 12 دوبہ دار آتے دزگیرکرے۔ اے این ایف ہیڈکوارٹر راولپنڈی آن جاری تدوک آ بیست ءُ چار گھنٹہ نا انسداد منشیات کارروائی تا سرجم حوال آتا رداٹ دا کارروائی تیٹی 6 کروڑ روپئی آن زیات مالیت نا 251.34 کلوگرام منشیات دوئی کننگا۔ موتی رام روڈ کوئٹہ ٹی یونیورسٹی نا خڑک دوبہ دار اسے آن 160 نشئی ءُ گولی و 100 گرام آئس دوئی کننگا۔ ترجمان پارے کہ دزگیر دوبہ دار تعلیمی ادارہ غاتا طالب علم آتے منشیات بہاکننگ نا اعتراف ہم کرینے۔ اسلام آباد اٹی کوریئر آفس نا کمک اٹ برطانیہ غا مون تروک آ پارسل اٹی لیڈیز بیگ اٹی اودیم کروک 95 گرام ہیرون دوئی کننگا۔ بلوچستان اٹی نوکنڈی آن اسمگلنگ کن اودیم کروک 137 کلوگرام ہفیم دوئی کننگا۔ ایم ون اسلام آباد اٹی اِرا کارروائی تیٹی گاڈی اسے ٹی اودیم کروک 34.4کلوگرام چرس، 30 کلوگرام ہفیم ، 10 کلوگرام ہیرون و 5 کلوگرام آئس دوئی کرسا 2 دوبہ دار آتے دزگیرکرے۔ کامونکی ٹول پلازہ گوجرانوالہ نا خڑک 12 کلوگرام چرس و 2.4 کلوگرام ہفیم دوئی کرسا 3 دوبہ دار آتے دزگیرکننگا۔ نیشنل ہائی وے حیدر آباد نا خڑک دوبہ دار آن 9.6 کلوگرام چرس دوئی کننگا۔ شکارپور سکھر اٹی ریسٹورنٹ نا خڑک اِرادوبہ دار آن 6 کلوگرام چرس دوئی کننگا۔ اسلام آباد سیکٹرE/11اٹی نائجیرین باتی اسے آ ن 1 کوکین آن پُر کیپسول و 300 گرام آئس دوئی کننگا۔ شیخوپورہ ٹی اِرا جتا کارروائی تیٹی اِرا دوبہ دار آن 2 ڈرون اتون اوار 3.59 کلوگرام ہیرون دوئی کننگا۔ ترجمان پارے کہ دزگیر دوبہ دار نا برخلاف انسداد منشیات ایکٹ انا رداٹ مقدمہ نوشتہ کرسا جاست وپاست نا بناءِ کننگانے۔
