لاہور۔ 09 دسمبر (اے پی پی) بنجائی وزیر ڈٹ بندی و شونداری پروفیسر احسن اقبال پارینے کہ انجینئرآک راج اسے نا ٹہیفنگ و شونداری ٹی تمبہ نا حیثیت تخرہ، ملکی شونداری ٹی انجینئرآتے تینا کڑد ءِ ادا کروئی مریک۔ پاکستان اسہ برانڈ اسے بدبختی اٹ نن دابرانڈ ءِ دھندلاکرین، داسہ ردینک آتا ہچ ءُ گنجائشت اس اف، بطور قوم خواری کرسا 77 سال آتا نسخان ءِ پورو کروئی مریک، سائنس و ٹیکنالوجی و ڈویلپمنٹ پوگرام آن ورناانجینئرآتے روزگار نا وارخواہی دوبریک، سٹاک مارکیٹ اٹی ودکی است بڈ ءِ، ہرا جمرآتیٹی نن تموک اُن کرارکرار آ او چٹنگ ءُ۔ داخیال آتا درشانی ءِ او دوشنبے نادے آ داڑے یونیورسٹی آف سینٹرل پنجاب (یوسی پی) ٹی سول انجینئرنگ نا بابت ارٹ میکو سالانہ جہانی کانفرنس آن تران کرساکرے۔ داوخت آ پروریکٹر یوسی پی ڈاکٹر حماد نوید، ڈین فیکلٹی ڈاکٹر محمد رضوان شاہ، ہیڈ آف ڈیپارٹمنٹ سول انجینئرنگ پروفیسر ڈاکٹر کفیل احمد، آرگنائزر ڈاکٹر فواد مظفر، ڈاکٹر فراز، ڈینز، ڈائریکٹرز، استاد، طالب علم، صحافی و چندی مکتبہ فکر آن تعلق تخوک آ بندغ آتا بھلو کچ اس ساڑی ئسر۔ بنجائی وزیرپارے کہ انجینئرآک راج اٹی اوفتا تعمیر و شونداری کن حقی کڑد ادا کیرہ، سائنسدان ہرا علم ءِ دریافت کیرہ او علم ءِ عملی دروشم اس انجینئرآک ہی ایترہ ہرا انسانیت نا گچینی نا سوب مریرہ، ملک اسے ٹی اونا انجینئرآتا انت آب، ہند و مرتبہ اسے ہموملک انا شونداری آن معلوم مریک، پاکستان نا شونداری ٹی ننا سول انجینئرآتا کڑد ہر بشخ اٹی نما ن ءِ چائے منگلاڈیم ، تربیلا ڈیم نا ڈٹ مرے، موٹرویز مرے یا جتا تعمیراتی ڈٹ، حتی کہ ننا نیوکلیئر پروگرام ءِ سول انجینئر آتیان بیدس نن حقیقت نا رنگ اس تننگ کپنہ، سول انجینئرآک ہر بشخ اٹی بھلو خذمت اس سرتسنو، ہرافتےاست آن دننگ مفک۔
