اسلام آباد۔ 09 دسمبر (اے پی پی) ایسوسی ایٹڈ پریس آف پاکستان (اے پی پی) ٹی جعلی تعیناتی تا کیس اٹی مبینہ وڑاٹ اوار پنچ بندغ ءِ دزگیرکننگانے۔ ہندا بندغ آتا دزگیری دوشنبے نادے آ خصوصی جج ایف آئی اے کورٹ، ہمایوں دلاور نا کنڈآن اوفتا عبوری ضمانت ءِ مسترد کننگ آن پد عمل اٹ بسنے۔ دزگیر دوبہ دار آتیٹی مسکوہی منیجر اکاؤنٹس ارشد مجید،اونا مار تیمور ارشد، سعد یوسف، قیصرجاوید و فواد خان ئسک اوار ءُ۔ بنجائی جاست وپاستی ایجنسی (ایف آئی اے) دا دوبہ غاتارداٹ مقدمہ درج کریسس کہ دوبہ دار آک اے پی پی ٹی جعلی تعیناتی تیٹی آسراتی ودی کننگ اٹ کڑد ادا کریر۔ جاست وپاستی آفیسر احتشام گوندل دوبہ دار آتا عبوری ضمانت نا درخواست آتا مخالفت کرسا پارے کہ دوبہ دار آتا بابت بھلو شاہدی اس ساڑی ءِ ۔ اے پی پی نا کنڈآن پیش مروک آ وکیل حسنین حیدر تھہیم دلیل ترسا پارے کہ ارشد مجید 20 بندغ آتا جعلی تعیناتی تیٹی مرکزی کڑد ادا کرینے۔ اوعدالت آن اے پی پی نا اسسٹنٹ اکاؤنٹس معظم جاوید کھوکھر و مسکوہی منیجر ایچ آر خواجہ آصف نا پن ءِ ہم ایف آئی آراٹی اوار کننگ نا خواست کرینے۔ایف آئی اے مہالو پاریسس کہ دا جعلی بھرتیک اے پی پی ءِ بھلو مالی نسخان اس تسنو واونا بھرتی نا عمل نا شفافیت ءِ ہم مجروح کرینو۔ ایجنسی دا باندات اٹی پین اوار بندغ آتا درستی راستی کن جاست وپاست ءِ برجاتخانے۔
