اسلام آباد۔ 09 دسمبر (اےپی پی) پاکستان تون اوار مچ آ دنیا ٹی انسانی حق انا جہانی دے ءِ پگہ (سے شنبے آ) اڈتننگک۔ دادے انسانی حق انا جہانی اعلامیہ یوڈی ایچ آرناسال دےانا وخت آ اڈتننگک۔ داتاریخی دستاویز اٹی نسل ، رنگ ، مذہب، جنس، زبان، سیاسی یا ایلو سلاہ، قومی یا راجی حقیقت، میرات، ودی یا پین حیثیت آن قطع نظر ہمو ناقابل تنسیخ حق آتے اوار کننگانے ہرافتا ہربندغ بطور انسان حقدار ءِ۔ برجاسال انسانی حق انا دے 2024نا سرحال’’ننا حق، ننا آخبت گچین کننگانے۔ انسانی حق انا دے 2024، چناو ورناتا نیام اٹ انسانی حق، تعلیم ءِ مون آ دننگ آ چکار کیک ہراچنک سنی ٹی بریبری، انصاف و شرف نا قدر آتے مون آدننگ نا اہمیت ءِ تالان کیک۔ دادے بندغ و قوم تیکن انسانی وقار نا رکھ اکن تینا عزم انا درشانی ءِ کننگ کن اسہ یات دہانی نا کاریم ہم کیک۔ دادے انا پڑو ءِ 10 دسمبر 1948آ پیرس اٹی اقوام متحدہ نا جنرل اسمبلی کریسس داٹی اولیکووار بنداوی انسانی حق اناجہانی وڑاٹ رکھ ءِ کننگاسس۔ انسانی حق انا جہانی دے انا رداٹ سرکاری و غیرسرکاری و نجی ادارہ غاتا کنڈآن چندی دود آتے اڈتننگک۔
