ریاض۔4دسمبر (اے پی پی):مزن وزیر محمد شہباز شریف سعودی عرب ءِ 2روچ ءِ تر ءُ تاب ءَ سرجم کنگ ءَ پد وتی ملک ءَ شتگ۔ چار شمبے ءِ روچ ءَ مزن وزیر کارگس ءِ نیمگ ءَ جاڑی بوتگیں میڈیا ریلیز ءِ رد ءَ مزن وزیر ءَ سعودی عرب ءِ تر ءُ تاب ءِ وھد ءَ ریاض ءَ برجم داشتگیں ون واٹر سمٹ ءَ شریک بوتگ۔ مزن وزیر ءَ دانا آناں آیوکیں آپ ءِ کمیگ ءَ چہ رکھینگ ءِ واستہ شش نکاتی ایجنڈا ءِ تجویز پیش کت ءُ دیمروئی کنوکیں ملک آنی تہ ءَ چاگردی ھرابکاری ءِ ھترہ آنی سبب ءَ پاکستان ءَ را دیم ءَ اتکگیں مشکل ءُ چیلنج آناں ھم پدر کت۔ مزن وزیر ءَ ریاض ءَ ولی عہد ءُ سعودی عرب ءِ مزن وزیر شہزادہ محمد بن سلمان السعود ءَ گوں ہم گند ءُ نند کت، ایشی ءِ تہا دوئیں رہشوناں پاکستان ءُ سعودی سیادی ءَ را گیش دیمروئی دیگ ءُ ایشی ءِ تہا مزنیں بدلی آرگ ءِ واستہ وتی یکجائی عزم ءِ پدا زور دات۔ دوئیں رہشوناں پاکستان ءَ سرمایہ کاری ءِ ھوالگ ءَ سعودی مفاہمت نامہ ءُ معاہدہ آنی سر ءَ عمل درآمد ءِ تیزی ءِ سر ءَ وتی دل یکیمی ءِ درشانی کت , پنین ءَ پیشہ وارانہ مہارت آنی دیمروئی ءُ ساپیں آپ ءِ شوبگ آنی تہ ءَ کاروباری رابطہ آنی وسیلگ ءَ کمک ءَ را گیش کنگ ءِ سر ءَ تپاک کت۔
