ملکی حالیت آک گچینی نا کنڈآ ہِننگ ءُ، ننا زرگزرانی حکمت عملی نا سوب آن کبینی ٹی پیدوار کمتی بننگ ءِ، بنجائی وزیر پروفیسر احسن اقبال

اسلام آباد۔ 04 دسمبر (اے پی پی) بنجائی وزیر ڈٹ بندی، اصلاحات و خصوصی گام گیج پروفیسر احسن اقبال پارینے کہ ملکی حالیت آک کرار کرار آ گچینی  نا کنڈآ ہِننگ ءُ، ننا زرگزرانی حکمت عملی نا سوب آ ن کبینی ٹی پیدوار کمتی بننگ ءِ، داخیال آتا درشانی ءِ او کراچی ٹی پی ایم ایل (ن) سندھ انا دیوان اٹی میڈیا تون گپ وتران کرساکرے۔ بنجائی وزیر پارے کہ ای بنجائی وزیر مننگ تون پارٹی نا سیکرٹری ہم اریٹ، ہشت تُو مشکل آتا چٹفنگ اٹ ہنا، ملکی حالیت آک کرار کرار آ گچینی نا کنڈآ ہِننگ ءُ۔ پروفیسر احسن اقبال پارے کہ ننا زرگزرانی حکمت عملی نا سوب آن کبینی ٹی پیدوار کمتی بننگ ءِ، ملک انا غٹ زرگزرانی ٹک آک مثبت رجحان نشان تننگ ءُ۔ اونا پاننگ ئس کہ پاکستان ءِ سازش نا رداٹ لسانی پرخ اٹ الجھائفنگ انگ ءِ، گلگت بلتستان و بلوچستان اٹی قومیت و لسانیت نا مون آ دننگ آن ملک ءِ نزور کننگ نا کوشست مننگ ءِ۔ احسن اقبال پارے کہ قائد اعظم لندن آن پدی برسا جتا ءُ وطن اسے کن 17 چٹھی نوشتہ کرے ، سویلی ایشیانا مسلمان تا زرگزرانی آخبت کن آجوملک جوڑ مس۔ اوپارے کہ پاکستان نا نظریہ ٹی زرگزرانی شونداری نا تصور ہم اوار ئس، 1999ٹی نن سویلی ایشیاٹی غٹ آن مون آ ئسن، اینو افسوز اتون غٹ آن پدی اُن، پاکستان ءِ بروک آ23 سال آتیٹی شونداری نا سپرٹ نا گرج ءِ۔ اونا پاننگ ئس کہ ہراتم کہ مسلم لیگ اقتدار اٹی بس ملک شون ہلک، غٹ دورآک اسہ کنڈآ تخر مسلم لیگ ن نا اقتدار اٹی شونداری ڈٹ آتا ہچ ءُ مقابلہ اس اف، پاکستان مسلم لیگ نا نظریہ ملک انا سوگو آخبت نا ضمانت ءِ۔ بنجائی وزیر پارے کہ مسلم لیگ نا عہدیدار و کارندہ غاتے خراج تحسین پیش کیوہ، ہروڑنا حالیت آتیٹی کارندہ غاک مسلم لیگ نا بیرک ءُ شیف مننگ ک الیتور۔ پروفیسر احسن اقبال پارے کہ صوبہ سندھ اٹی پارٹی سرکڑدہ و کارندہ غاک مسلم لیگ (ن) نا گچین دروشم ءِ تالان کیر، سندھ اٹی ہم مسلم لیگ (ن) ءِ موقع تننگے۔ اوپارے کہ سندھ اٹی غاوتا پوروی کمیٹی اس جوڑ کننگانے، صوبہ ٹی مسلم لیگ (ن) ءِ اہمیت بایدے تننگے و اوفتا ویل آتے بایدے ایسر کننگے۔ اونا پاننگ ئس کہ 30 دسمبر آ مسلم لیگ (ن) نایوم تاسیس ءِ اودے پبی وڑاٹ اڈایتر، پک کیر کہ سندھ اٹی ہم مسلم لیگ (ن) سوگو جماعت ءِ۔ پروفیسر احسن اقبال پارے کہ کراچی کن مسلم لیگ (ن) نا بے شمار خذمت آک ءُ، اونا امن ءِ بحال کرسا مسلم لیگ (ن) نا قائد قول ءِ پورو کرے۔