اسلام آباد۔3دسمبر (اے پی پی): صدر آصف علی زرداری ءَ پاکستان بلائنڈ کرکٹ ٹیم ءَ را چارمی بلائنڈ ٹی ٹوئنٹی ورلڈ کپ ءِ سوبمندی ءِ سر ءَ مبارکی دات ءُ گوشت کہ معذوریں مردم ھم لیب ءُ گوازی ءِ پڑ ءَ مزنیں کردے پیلو کت کن اَنت۔ سئے شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ مملکت ءِ صدر ءَ ٹی ٹوئنٹی بلائنڈ کرکٹ ورلڈ کپ ءِ فائنل ءَ بنگلہ دیش ءَ را 10 وکٹ ءَ چہ ہلاس کنگ ءِ سر ءَ ٹیم ءِ توسیپ کتگ۔ آئی ءَ گوشت کہ پاکستان بلائنڈ کرکٹ ٹیم ءَ فائنل ءَ جوانیں پرستی کتگ۔ مملکت ءِ صدر ءَ گوشت کہ ھاسیں مردم آنی میاں اوستمانی روچ ءِ موہ ءَ پاکستان بلائنڈ کرکٹ ٹیم ءَ را بلائنڈ کرکٹ ورلڈ کپ ءِ سوبمندی ءِ سر ءَ مبارکی دیان آں ۔ صدر آصف علی زرداری ءَ گوشت کہ ھاسیں لیب کنوکاں بلائنڈ ٹی ٹوئنٹی ورلڈ کپ ءِ سوبمندی ءَ گوں پاکستان ءَ را نامدار کتگ۔ صدر ءِ مملکت ءَ گوشت کہ زندمان ءِ توامیں پڑ آنی تہ ءَ ھاسیں مردم آنی بھر زوری ءَ را گیش کنگ لوٹ ایت، ھاسیں مردم آناں دیم ءَ جنزگ ءُ دیمروئی کنگ ءِ واستہ موہ دیگ لوٹ ایت۔ صدر ءِ مملکت ءَ کامیابیں ٹورنامنٹ ءِ برجم دارگ ءِ پد ءَ پاکستان بلائنڈ کرکٹ کونسل ءَ را مبارک بات دات ءُ پاکستان بلائنڈ کرکٹ ٹیمب ءِ آیوکیں باندات ءِ واستہ نیکیں واھگ آنی درشان کت۔
