اسلام آباد۔3دسمبر (اے پی پی): مزن وزیر محمد شہبا ز شریف ءَ پنتءُ شون کتگ کہ دھرنا آنی وہدءَ کانود ءِ اہلکار آنی سرءَ اُرش کنگءُ آیاں ٹپیگ ءُ شہید کنگ ، سرکانی مال ءُ مڈیاناں نقصان دئیوکاناں سزا دئیگ بہ بیت۔ مز ن وزیر کارگس ءِ میڈیا ونگءِ نیمگءَ چہ شنگ بوتگیں بیان ءِ ردءَ سئے شمبے ءِ روچءَ مزن وزیر ءِ سروکی ءَ اسلام آباد ءَ 24 نومبر ءَ بوتگیں دھرنا آنی تہا پساتانی بابتءَ پٹءُ پول کنگءِ ھاترءَ جوڑ کتگیں ٹاسک فورس ءِ دیوان جوڑ کتگ۔ دیوان ءِ تہا تہی کارانی وزیر سید محسن ر ضا نقوی ، اقتصادی پڑءِ وزیر احد چیمہ، کانودءِ وزیر اعظم نذیر تارڑ، مزن وزیر ءِ صلہ کار رانا ثنا اللہ ءُ ایندگہ مزنیں افسر ہوار بوتگ اَنت۔ دیوان ءَ گوں گوں تران کتگءُ مزن وزیر ءَ گشتگ کہ تکانسری ودی کنوکاں بیلا روس ءِ صدر ءِ پاکستان ءِ سرکاری ترءُ تاب ءِ وہدءَ ملک ءِ بنجاہی حکومت ءِ سرءَ لشکر کشی کتگ کہ اے پہ مئے ھاترءَ شرم ءِ گپ بوتگ۔ مزن ءَ گشتگ کہ ملک ءِ تہا تکانسری ودی کنوکانی حلاپءَ کانودی کاروائی ءِ سرءَ ہفتگی چارءُ تپاسی کنگ بیت۔ آئی ءَ پنتءُ شون کتگ کہ دھرنا آنی وہدءَ سرکاری مال ءُ مڈیاناں نقصان دئیگ ءُ کانودی اہلکاراناں شہیدءُ ٹپیگ کنوکاناں سزا دئیگ بہ بیت۔ آئی ءَ گشتگ کہ انوگیں وہدءِ لوٹ ءِ ردءَ میاں اوستمانی معیار ءِ پساتانی گرءُ دا ری فورس جوڑ کنگ بہ بیت، اسلام آباد سیف سٹی ءِ تہا فارنزک لیب ہوار کنگ بہ بیت ءُ آئی ءَ را میاں اوستمانی معیار ءِ ردءَ جوڑ کنگ بہ بیت ءُ پہ ایشی ءِ ھاترءَ سرجمیں گامگیج چست کنگ بہ بنت۔ مزن وزیرءَ را حال دئیگ بوتگ کہ ک موہ ءِ سرءَ سلاہ، تیرگواری ءِ نتیجگءَ دست کپتگیں تیر ءُ کوکا ءُ ایندگہ ثبوت جم کنگ بوتگ اَنت ءُ درائیں ثبوت پہ فارنزک ءِ ھاترءَ دیم دئیگ بوتگ اَنت۔ مردمانی پجارءَ پد درائیں پساتی آمید گساں پیش کنگ بنت۔
