اسلام آباد۔ 03 دسمبر (اے پی پی) صدر مملکت آصف علی زرداری پاکستان بلائنڈ کرکٹ ٹیم ءِ چارمیکو بلائنڈ ٹی 20 ورلڈ کپ ءِ کٹنگ آمبارکبادی ترساپارینے کہ معذوری نا حامل بندغ آک ہم گوازی نا بشخ اٹی نمان کڑد ادا کننگ کیرہ۔ سے شنبے نادے آ ایوان صدر نا پریس ونگ آن جاری بیان نا رداٹ صدر مملکت ٹی 20 بلائنڈ کرکٹ ورلڈ کپ فائنل اٹی بنگلہ دیش ءِ 10 وکٹ آتے اٹ باترفنگ آ ٹیم انا ستاءِ کرے۔ اوپارے کہ پاکستان بلائنڈ کرکٹ ٹیم فائنل اٹی جوان ءُ گوازی اس نشان تسنے۔ صدر مملکت پارے کہ خصوصی بندغ آتا جہانی دے انا وخت آ بلائنڈ کرکٹ ورلڈ کپ ءِ کٹنگ آ پاکستان بلائنڈ کرکٹ ٹیم ءِ مبارکبادی ایتیوہ۔ صدر آصف علی زرداری پارے کہ خصوصی گوازی گر آک بلائنڈ ٹی 20 ورلڈ کپ ءِ کٹسا پاکستان نا پن ءِ روشناکرینو۔ صدر مملکت پارے کہ گوازی تون اوار زند انا غٹ بشخ آتیٹی خصوصی بندغ آتاشمولیت ءِ ودفوئی مریک، خصوصی بندغ آتے مون آ ہِننگ و شونداری کننگ نا وارخواہی فراوان کننگ نا گرج ءِ۔ صدر پاکستان بلائنڈ کرکٹ کونسل ءِ سرسہب ٹورنامنٹ نا اڈتننگ آ مبارکبادی ترسا پاکستان بلائنڈ کرکٹ ٹیم انا آخبت کن نیک است خواہی نا درشانی ءِ کرے۔
