اسلام آباد۔ 03 دسمبر (اے پی پی) بنجائی وزیر داخلہ محسن نقوی نا کماشی ٹی نیشنل ایکشن پلان نا کوآرڈی نیشن کمیٹی نا اہم دیوان اس اڈ ہلک۔ دیوان اٹی نیکٹا و صوبہ غاتا نیام اٹ کوآرڈی نیشن ءِ گچین کننگ نا فیصلہ ءِ کننگا۔ بنجائی وزیر داخلہ محسن نقوی پارے کہ گچین کوآرڈی نیشن کن نیشنل فیوژن سینٹر جوڑ کننگانے۔ حوال اٹی پاننگاکہ برجاسال اکتوبر اسکان 7984انٹیلی جنس بیسڈ آپریشن آتیٹی 206 دہشت گرد آتے جہنمی کننگا۔ دیوان اٹی سوشل میڈیا غا کالعدم دہشت گرد تنظیم تا سرجز آتا توننگ کن جوان گام گیج آتا فیصلہ ءِ کننگا۔ دارداٹ پی ٹی اے نا کمک اٹ دہشت گرد گروپ آتا اکاؤنٹ آتے بلاک کننگک وخت اس کہ غیرکانودی سم آتا توننگ کن صوبہ جوان حکمت عملی اسے نا رداٹ گام گیج کیک۔ بروک آ دیوان اٹی پی ٹی اے تون اوار غٹ تعلقدار ادارہ غاتا بڑزکو کمامدارآتے گچین میکنزم پیش کننگ نا پارت کننگا۔ وزیرداخلہ پارے کہ صوبہ بلوچستان و صوبہ خیبرپختونخوا ٹی دہشت گردی نا ساڑی آ واقعہ غاک بھاز است ہسون و قابل مذمت ءُ، دہشت گردی تون مون تننگ کن بلوچستان و خیبرپختونخوا ٹی کاؤنٹر ٹیررزم فورس انا کسبی لائخی تے گچین کننگ کن پبی کمک کینہ وخت اس کہ پولیس و فرنٹیئر کانسٹیبلری ءِ سوگو کننگک۔ اوپارے کہ امن وایمنی نا حالیت آتے گچین کننگ کن غٹ ءِ اواری اٹ کاریم کروئی ءِ۔ بنجائی وزیر داخلہ پارے کہ کاریم نا کچ ءِ ودفنگ تون غٹ صوبہ غاتا پولیس ءِ پوسکن آ ٹیکنالوجی آن شپ کننگ ءِ۔ وزیرداخلہ محسن نقوی کانود نافذ کروک آ ادارہ غاتاگرج آتے اولیتی بنداو تیا پورو کننگ نا پڑو کرسا ہفت دے اٹی غٹ ادارہ غاتے گرج آتا بابت رپورٹ وزارت داخلہ ءِ گدریفنگ ناپارت کرے۔ محسن نقوی پیدوار کرے کہ نیکٹا دہشت گردی نا برخلاف جنگ اٹی لیڈنگ کڑد ادا کیک، نیکٹا ٹی اصلاحات نا بناءِ کرینن، نیکٹا نا اصل رول ءِ بحال کننگ انگ ءِ۔ دیوان اٹی چینی شاری تا سیکورٹی کن کروک آبست وبند آتا ہم جاچ ءِ ہلنگا۔ وزیرداخلہ چینی شاری تا رکھ اکن فول پروف سیکورٹی پلان آ من وعن عملدرآمد نا پارت کرے۔ اوپارے کہ کوسٹل ایریہ غاتیٹی نارکوٹکس اسمگلنگ ءِ توننگ کن کوسٹل گارڈ آتے آسراتی فراوان کینہ۔ دیوان اٹی انسداد ہشت گردی کن ہلوک آ فیصلہ غاتیا عملدرآمد نا اسٹ اسٹ آ جاچ ءِ ہلنگا۔ اسلام آباد اٹی کاؤنٹر ٹیررزم اتھارٹی نا جوڑ کننگ آ پیش رفت نا ہم جاچ ءِ ہلنگا۔ دیوان اٹی نیشنل کوآرڈی نیٹر نیکٹا خالد خٹک پین جاچ دیوان اسے آ عملدرآمد نا بابت سرجمی اٹ حوال تس۔ بنجائی سیکرٹری داخلہ، نیشنل کوآرڈی نیٹر نیکٹا، غٹ آئی جی، آئی جی ریلوائی پولیس، کمانڈنٹ فرنٹیئر کانسٹیبلری، آئی جی اسلام آباد پولیس، وزارت داخلہ و کانود نافذ کروک آ ادارہ غاتا بڑزکو کمامدارآک ہم دیوان اٹی ساڑی ئسر۔
