آئی ایم ایف تون پروگرام آ عملدرآمد برجا، دا سوگو، پائیدار و ہمہ گیر زرگزرانی شونداری نا بنداو ءِ، وزارت خزانہ

اسلام آباد۔ 03 دسمبر (اے پی پی) بنجائی وزارت خزانہ پارینے کہ جہانی مالیاتی فنڈ (آئی ایم ایف ) تون پروگرام آ عملدرآمد برجاءِ، آئی ایم ایف پروگرام آ عملدرآمد سوگو، پائیدار و ہمہ گیر زرگزرانی شونداری نا بنداو ءِ۔ وزارت خزانہ نا کنڈآن سے شنبے نادے آ جاری بیان اٹی پاننگانے کہ حکومت آئی ایم ایف تون طے کروک ہدف آتیا عملدرمد کن سنبرینگوک ءِ، آئی ایم ایف تون خڑکی رابطہ و سلابت آن 37 تُو آ تالان پروگرام ءِ سرسہبی اٹ پورو کننگک۔ بیان اٹی پاننگانے کہ وزیرخزانہ ومحصولات سینیٹر محمد اورنگزیب قومی اسمبلی نا قائمہ کمیٹی خزانہ نا ساڑی آ دیوان ءِ حوال اٹی آجو زرگزران نا سوگوی نا رداٹ اصلاحات آ سختی اٹ کاربند مننگ نا چرجوئی اٹ درشانی ءِ کرے۔ وزیرخزانہ ملک انا دیرپا و آخبتی زرگزرانی سوگوی کن آئی ایم ایف پروگرام نا اہم اہمیت نا درشانی ءِ کرے۔ وزیرخزانہ نا پاکستان نا زرگزرانی آخبت کن آئی ایم ایف پروگرام نا اہمیت و اوڑآ عملدرآمد نا درشانی نا قومی پریس اٹی ہم پبی عکاسی مس۔ بیان اٹی پاننگانے کہ آئی ایم ایف پروگرام آ عملدرآمد اٹی پن انا مشکل آتا بابت قیاس آرائی انفرادی اختراع نا عکاس و متبر شاہدی آن عاری ءِ، حکومت زرگزرانی سوگوی ءِ برقرار تخنگ و تندہی و شفافیت اٹ آئی ایم ایف تون طے مروک ہدف آتیا غٹ تر چکار کرینے۔ بیان اٹی پاننگانے کہ آئی ایم ایف پروگرام آ عملدرآمد اسہ سوگو، پائیدار و ہمہ گیر زرگزرانی شونداری نا بنداو ءِ۔