اسلام آباد۔ 03 دسمبر (اے پی پی) وزیراعظم محمد شہبا زشریف سے شنبے نادے آ اِرادے ئی دورہ غا سعودی عرب آ روانہ مس۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف ساف دِیر و آبی کوڑی تا رکھ انا بابت ریاض اٹی اڈہلوک ون واٹر سروکی دیوان (One Water Summit)اٹی بشخ ہلیک۔ سعودی عرب، فرانس، قازقستان و جہانی بینک انا شریداری اٹ اڈ ہلوک ون۔ واٹر سروکی دیوان نا مسخت جہانی کہول آجہانی کمکاری و بڑزکو کہولی سیاسی عزم انا کمک اٹ آبی کوڑی تا گچین بست وبند و رکھ انا دوئی کننگ ءِ پک کننگ ناءِ۔ وزیراعظم سروکی دیوان اٹی ساف دیر انا کوڑی تا بحالی، رکھ و دابابت جدت نا سرحال آ تران کیک۔ وزیراعظم پاکستان آبی کوڑی نا رکھ ، چاگڑدی بدلی آن بچفنگ نا تیاری، کنوئی آ دیر انا آب انا گچینی، روزگار نا فراوانی و آبی حیات نا رکھ اکن کروک آگام گیج آتے مون آتخک۔ وزیراعظم چاگڑدی بدلی نا سوب آن بروک نوکاپ، موسم آتیٹی بے وخت بدلی و ودوک آ درجہ حرارت نا آبی کوڑی و آبی حیات آ اثرآتا مون ءِ توننگ کن جہانی کمکاری نا اہمیت ءِ ہم مون آ تخک۔ وزیراعظم جہانی برادری ءِ آبی وسیلہ غاتا پائیدار و گچین بست وبند کن گام گیج آتا سلہ خلیک۔ داوخت آ وزیراعظم نا سروکی دیوان اٹی شریک جہانی راہشون آتون اوڑدہی ہم گمانی ءِ۔ بنجائی وزیر حوالکاری و شینکاری عطاء اللہ تارڑ و وزیراعظم نا خصوصی کمکار طارق فاطمی ئسک ہم وزیراعظم تون اوار ءُ۔
